И забавата дома станува луксуз: Растат цените на стримингот, игрите и струјата

Дури и забавата во сопствениот дом станува сè поскап луксуз за многу домаќинства. По долг период во кој растот на цените ги погоди концертите, спортските настани и другите форми на забава надвор од домот, новите анализи покажуваат дека трошоците за домашна рекреација исто така бележат значително зголемување.

Анализираните податоци покажуваат дека потрошувачите во јуни потрошиле помалку за домашна забава во споредба со истиот период минатата година. Намалената потрошувачка се должи на повисоките цени во повеќе категории, поради што многумина ги ограничуваат своите трошоци.

Особено погоден е пазарот на видеоигри. Иако традиционално цените на конзолите опаѓаа неколку години по нивното лансирање, овој тренд е нарушен. Повисоките царини, заедно со огромната побарувачка за мемориски чипови што ја поттикнува развојот на вештачката интелигенција, ги задржаа цените на гејмерската опрема на високо ниво.

Поскапувањата не ги одминаа ниту дигиталните платформи за забава. Во последниот период повеќе водечки стриминг-сервиси ги зголемија цените на своите претплати, што дополнително го оптоварува буџетот на корисниците. Меѓу платформите кои воведоа повисоки месечни надоместоци се Netflix, Prime Video, Spotify, Crunchyroll, Paramount+ и YouTube Premium.

Сличен тренд е забележан и кај услугите за домашно вежбање. Компаниите што нудат дигитални фитнес-програми, како Peloton, Jazzercise On Demand и Pvolve, во текот на изминатата година ги зголемија цените на своите претплати, што ја прави и оваа форма на рекреација поскапа.

Дополнителен товар претставуваат и повисоките сметки за електрична енергија. Според прогнозите, цената на струјата ова лето би можела да достигне рекордно високо ниво, што ќе ги зголеми трошоците за сите уреди што секојдневно се користат во домаќинствата – од телевизори и компјутери до клима-уреди и конзоли за игри.

И покрај трендот на поскапување, постојат и активности кои остануваат релативно достапни. Читањето книги и натаму е една од најевтините форми на забава, а интересот за книгите повторно расте, што според аналитичарите претставува позитивен сигнал во време кога дигиталната забава станува сè поскап избор.

Економистите оценуваат дека инфлацијата постепено го менува начинот на кој луѓето го организираат своето слободно време. Ако порано престојот дома се сметаше за поевтина алтернатива на излегувањето, денес и домашната забава бара значително поголеми трошоци отколку пред само неколку години.