Нова генерација милионери: Спортистите под 25 доминираат на листата на Forbes

Најплатените спортисти во светот помлади од 25 години во 2026 година заработија стотици милиони долари, потврдувајќи дека новата генерација спортски ѕвезди веќе ја презема глобалната сцена и на теренот и надвор од него. Според анализата на Forbes, шест млади спортисти во изминатите 12 месеци инкасирале вкупно околу 384 милиони долари преку плати, бонуси, наградни фондови и спонзорски договори.

На врвот на листата се најде норвешкиот фудбалер Ерлинг Халанд, кој со приходи од околу 80 милиони долари е најплатениот спортист во светот до 25 години. Напаѓачот на Манчестер Сити продолжува да руши рекорди во Премиер лигата и Лигата на шампионите, а дополнителен раст на заработката му донесоа новиот долгорочен договор со англискиот клуб и спонзорствата со глобални брендови.

Веднаш зад него е НБА ѕвездата Ентони Едвардс со заработка од 69 милиони долари. Кошаркарот на Минесота Тимбервулвс бележи силен подем и на спортски и на маркетиншки план, а покрај кошарката се вклучи и во музички и медиумски проекти кои дополнително ја зголемија неговата популарност.

Меѓу најуспешните млади спортисти се и тениските ривали Карлос Алкараз и Јаник Синер, кои веќе се сметаат за наследници на големата генерација предводена од Федерер, Надал и Ѓоковиќ. Шпанецот Алкараз заработил 61,5 милиони долари, поттикнат од освојувањето на неколку Грен слем титули и голем број комерцијални договори. Италијанецот Синер, пак, инкасирал 54,6 милиони долари и продолжува да доминира на АТП-листата.

На листата се најде и бразилскиот фудбалер Винисиус Жуниор со 60 милиони долари заработка. И покрај критиките поради резултатите на Реал Мадрид сезонава, тој останува еден од највредните и најмаркетабилни играчи во светскиот фудбал.

Меѓу младите милионери е и кошаркарот Кејд Канингем, кој заработил 58,6 милиони долари благодарение на новиот богат договор со Детроит Пистонс и серијата спонзорства со американски компании.

Аналитичарите оценуваат дека оваа генерација спортисти значително порано стигнува до огромни приходи во споредба со претходните децении. Причината не е само спортскиот успех, туку и влијанието на социјалните мрежи, глобалниот маркетинг и експанзијата на спортската индустрија, која денес создава ѕвезди со светска вредност уште во раните дваесетти години од животот.