Microsoft и Discord ги поврзуваат своите претплати за гејмерите

Microsoft и Discord ја прошируваат својата долгогодишна соработка со нов пакет поволности што ќе ги поврзе нивните претплатнички сервиси и ќе им овозможи на гејмерите полесно откривање и пристап до игри преку заедничките платформи.

Discord ја претстави новата програма Nitro Rewards по повод десет години од лансирањето на претплатата Nitro, а првата голема придобивка за корисниците е вклучување на основната верзија на Xbox Game Pass без дополнителен трошок. Од компанијата велат дека целта е Nitro да прерасне во задолжителна претплата за секој активен гејмер.

Основниот пакет на Xbox Game Pass што ќе биде достапен преку Nitro овозможува пристап до библиотека со повеќе од 50 игри за компјутер и конзоли. Меѓу насловите се вклучени Fallout 4, Stardew Valley, DayZ, Deep Rock Galactic, Overcooked 2 и Grounded, а корисниците ќе добијат и 10 часа cloud gaming за стриминг на различни уреди.

Во исто време, Microsoft најави дека претплатниците на Game Pass ќе добиваат и Discord Nitro поволности, меѓу кои месечни Discord Orbs, дополнителни бонуси при исполнување задачи и автоматски попусти во Discord Shop. Овој дел од партнерството треба да стане активен подоцна во текот на месецот.

Соработката носи и подлабока интеграција на Xbox Game Pass во самата Discord апликација. Кога корисник ќе види дека негов пријател игра одреден наслов, преку копчето „Play“ ќе може директно да ја стартува играта преку Game Pass, без дополнителни чекори или отворање други платформи.

Покрај партнерството со Microsoft, новата Nitro Rewards програма вклучува и попусти за гејминг опрема од брендови како Logitech G, SteelSeries и KontrolFreek, со ротирачки понуди за претплатниците.

Иако Discord и Discord Nitro се официјално достапни во Македонија со целосен пристап до услугите, ситуацијата со Xbox Game Pass останува ограничена. PC Game Pass е достапен во земјава од 2023 година, но стандардниот Xbox Game Pass сè уште нема официјална поддршка, што значи дека македонските корисници засега нема да можат целосно да ги искористат новите бенефиции од соработката меѓу Microsoft и Discord.