Европа инвестира речиси 200 милијарди евра во развој на секторот за електрични возила

Европа досега инвестирала речиси 200 милијарди евра во развојот на секторот за електрични возила, покажуваат најновите податоци на британската истражувачка организација New Automotive. Најголемиот дел од средствата биле насочени кон производството на батерии и изградбата на синџирот за снабдување, во обид европските земји да ја намалат зависноста од Кина, која и понатаму доминира на глобалниот пазар.

Според анализата, околу 109 милијарди евра биле вложени во батерискиот сектор, додека дополнителни 60 милијарди евра се инвестирани во производство на електрични автомобили и трансформација на постојните фабрики за новите технологии. Во меѓувреме, европските држави продолжуваат интензивно да инвестираат и во инфраструктура за полнење, при што се проценува дека меѓу 23 и 46 милијарди евра јавни средства биле насочени кон поставување мрежа на полначи низ континентот.

Во Европа веќе функционираат повеќе од еден милион јавни станици за полнење на електрични возила, а дополнителни 3,5 милијарди евра биле инвестирани во производство на самата инфраструктура. Од организацијата New Automotive наведуваат дека овие вложувања моментално поддржуваат над 150.000 работни места, а доколку се реализираат сите најавени проекти, бројката би можела да порасне за уште 300.000 нови работни позиции.

Податоците покажуваат дека Германија останува убедливо најголем центар за инвестиции во европската автомобилска транзиција, со речиси една четвртина од вкупните вложувања во регионот. Земјата има клучна улога благодарение на присуството на големите автомобилски производители и фабриките за батерии, додека значајни инвестиции привлекуваат и Франција, Шпанија, Италија, како и државите од Централна и Источна Европа.

Извештајот доаѓа во период кога Европската унија повторно ја преиспитува својата стратегија за зелена транзиција во автомобилската индустрија. Европската комисија неодамна сигнализираше можност за ублажување на плановите за постепено укинување на автомобилите со мотори со внатрешно согорување до 2035 година, поради силниот притисок од автомобилскиот сектор и дел од земјите членки.

И покрај неизвесностите околу регулативите, европските производители продолжуваат со големи вложувања во електричната мобилност, додека континентот се обидува да остане конкурентен во трката со Кина и САД за иднината на автомобилската индустрија.