Скриена инсталација во Chrome отвори дебата за приватноста и контролата

Google се соочува со критики откако беше откриено дека прелистувачот Chrome автоматски презема и инсталира голем модел за вештачка интелигенција на компјутерите на корисниците без јасно известување или претходна согласност. Според истражувачот за приватност Александар Ханф, познат во јавноста како „That Privacy Guy“, станува збор за датотека од околу 4 GB поврзана со локалната верзија на Gemini Nano, јазичниот модел на компанијата наменет за работа директно на уредите.

Моделот се зачувува во системските папки на корисничкиот профил и се активира автоматски доколку компјутерот ги исполнува потребните хардверски услови. Процесот се извршува во позадина, без класична опција преку која корисниците би можеле да изберат дали сакаат да го преземат или не.

Дополнителна загриженост предизвикува фактот што датотеката повторно се симнува дури и ако корисникот рачно ја избрише. Според анализите, единствениот начин трајно да се спречи ова автоматско преземање е преку напредни поставки во експерименталните функции на Chrome или со целосно отстранување на прелистувачот од системот.

Покрај прашањата за приватност и контрола врз локалниот простор за складирање, критичарите предупредуваат и на пошироките последици од ваквата практика. Со оглед на тоа што Chrome има милијарди активни корисници ширум светот, автоматското преземање на датотеки со големина од неколку гигабајти може значително да ја зголеми потрошувачката на интернет сообраќај, енергија и ресурси на уредите.

Случајот отвори нова дебата во ИТ заедницата за границите на автоматските ажурирања и за тоа колкава контрола треба да имаат технолошките компании врз корисничките уреди. Дел од експертите сметаат дека ваквите функции треба да бидат јасно објаснети и активирани исклучиво со согласност од корисникот, особено кога станува збор за големи системски промени и ВИ алатки што работат локално на компјутерите.