Трамп гради највисок облакодер во Грузија вреден две милијарди долари

Новиот облакодер „Трамп Тауер“ во Тбилиси полека го добива својот финален изглед, откако инвеститорите ги претставија најновите визуелизации на проектот што треба да стане највисоката зграда во Грузија. Станува збор за инвестиција вредна околу две милијарди долари, која е дел од поширок урбан проект за развој на нов деловен и туристички центар во грузиската престолнина.

Кулата ќе има 70 ката и ќе биде изградена во близина на градскиот Централен парк, а во неа се предвидени хотелски капацитети, луксузни станови, трговски простори и деловни канцеларии. Проектот е дел од комплексот „Тбилиси Даунтаун“, кој треба да опфати повеќе комерцијални и угостителски содржини.

Компанијата „Трамп Организација“ учествува преку лиценцирање и брендирање на проектот, што значи дека американскиот претседател Доналд Трамп би можел да оствари значителни приходи од користењето на неговото име и бренд. Според американските медиуми, ваквите договори во последните години станаа важен извор на приходи за семејниот бизнис на Трамп, а само во 2024 година заработката од странски лиценци значително пораснала.

Иако засега не е познато колку точно ќе заработи Трамп од проектот во Тбилиси, аналитичарите проценуваат дека приходите би можеле да достигнат неколку милиони долари. Токму поради тоа, новите меѓународни бизниси повторно отворија дебата во САД за можен судир на интереси, со оглед дека Трамп истовремено ја извршува функцијата претседател.

Експерти за владина етика предупредуваат дека ваквите проекти можат да создадат сомнежи околу влијанието на политичката функција врз приватниот бизнис. Од Белата куќа и „Трамп Организација“ и претходно ги отфрлаа ваквите критики, нагласувајќи дека компанијата е управувана од членовите на семејството и дека имотот е ставен под контрола на семеен траст.

Трамп има и подолга деловна историја со Грузија. Уште пред повеќе од една деценија постоеле планови за изградба на објект со неговото име во Тбилиси, но тие биле прекинати за време на неговиот прв претседателски мандат. Сега, со новиот бран меѓународни проекти, особено на Блискиот Исток и во Источна Европа, „Трамп Организација“ повторно агресивно се шири на странските пазари.

Проектот во грузиската престолнина се смета за еден од најамбициозните недвижни проекти во регионот и симбол на новиот инвестициски бран во Тбилиси, кој последниве години привлекува сè поголем број странски инвеститори и луксузни брендови.