Европските берзи со рекорден раст поради ублажување на трговските тензии меѓу САД и Кина

Вредноста на акциите на европските берзи денес забележа рекорден еднодневен раст, поттикната од оптимизмот по најавите за ублажување на трговските тензии меѓу САД и Кина. Пазарите реагираа позитивно на сигналите за можен договор меѓу двете најголеми светски економии, што предизвика зголемена подготвеност за ризично тргување и вложување во акции.

Според податоците на Ројтерс, европскиот индекс STOXX 600 се искачи на рекордни 576,37 поени, што претставува историски максимум и јасен показател за зголемена пазарна доверба.

Оптимизмот дополнително го поттикна изјавата на американскиот претседател Доналд Трамп, кој најави дека САД и Кина се блиску до постигнување трговски договор. Тој изрази очекување дека ќе се сретне со кинескиот лидер во текот на неделата во Јужна Кореја, каде што, според најавите, ќе се дефинира рамката на новиот трговски договор, продолжение на разговорите што се одвивале за време на викендот.

Иако Европската централна банка (ЕЦБ) не најави промени во каматните стапки за оваа недела, пазарите реагираа со ентузијазам, особено во секторите што се најосетливи на глобалната трговија.

Најголем добивка денес забележаа рудaрскиот и технолошкиот сектор, чии индекси пораснаа за 1,1 процент, следени од производствените компании, кои исто така покажаа стабилен раст. Од друга страна, секторот за комунални услуги забележа благ пад од 0,6 проценти, што аналитичарите го поврзуваат со пренасочување на капиталот кон подинамичните индустрии.

Финансиските експерти сметаат дека позитивниот тренд би можел да продолжи доколку преговорите меѓу Вашингтон и Пекинг навистина резултираат со конкретен договор, што би ја намалило глобалната економска неизвесност и би ги стабилизирало трговските текови.