Италијанско семејство изгради фармацевтска империја вредна 10 милијарди долари, а сега тргнува во освојување на Америка

Повеќе од еден век семејството Анџелини од Рим постепено го градеше своето деловно царство, најпрво во фармацевтската индустрија, а потоа и во низа други сектори. Денес нивната семејна империја се проценува на околу 10 милијарди долари, а новата генерација реши да направи чекор што може целосно да ја промени иднината на бизнисот – големо ширење на американскиот пазар.

Компанијата Angelini Pharma, која пред преземањето на американската Catalyst Pharmaceuticals остваруваше приходи од околу 1,5 милијарди долари, во мај годинава се согласи да ја купи американската биотехнолошка компанија за 4,1 милијарди долари во готовина. Трансакцијата беше финализирана во јули и со неа италијанската фармацевтска група практично доби директен пристап до едно од најголемите фармацевтски пазари во светот.

Зад стратегијата стојат Серџо Маруло ди Кондоџани, извршен директор на Angelini Industries и Angelini Pharma, и Теа Паола Анџелини, четвртата генерација на семејството која денес ја контролира компанијата.

„Од самиот почеток ни беше јасно дека сериозен раст во фармацевтската индустрија не е можен без присуство на американскиот пазар“, вели Маруло ди Кондоџани.

Иако името Анџелини можеби не е добро познато во САД, во Италија станува збор за компанија со долга традиција. Семејната групација Angelini Industries минатата година остварила околу 2,5 милијарди долари приходи, додека богатството на Теа Паола Анџелини и нејзиното семејство се проценува на приближно 10 милијарди долари.

Приказната започнува во 1919 година, кога Франческо Анџелини, тогаш 32-годишен фармацевт, основал мала компанија за производство и продажба на лекови во италијанскиот град Анкона.

Од таа мала фирма со текот на децениите израсна голема индустриска групација. Angelini Pharma денес е позната по повеќе лекови, меѓу кои и Tachipirina, препарат на база на парацетамол кој во Италија стана еден од најпродаваните лекови, како и тразодонот, антидепресив откриен од истражувачите на компанијата во 1960-тите.

Но фармацијата не беше единствената област во која семејството инвестираше. Групацијата се прошири и во производството на мириси, роботиката, винската индустрија и производите за широка потрошувачка. Преку заедничка компанија со Procter & Gamble, групацијата продава и производи како Pampers на италијанскиот пазар.

Семејството поседува и винарии во Тоскана, а нивното вино Bertani Amarone della Valpolicella дури добило максимална оценка од 100 поени од познатиот вински критичар Џејмс Саклинг.

Големиот пресврт во стратегијата доаѓа со четвртата генерација. Теа Паола Анџелини, која студирала клеточна и молекуларна биологија, постепено презема поголема улога во семејниот бизнис. Во 2025 година стана претседателка на Angelini Holding, матичната компанија на групацијата.

Нејзиниот сопруг Серџо Маруло ди Кондоџани, правник со докторат по домашна и меѓународна арбитража, пред да се приклучи на семејниот бизнис работел како професор по право и бил член на управен одбор во Banca Aletti.

Двајцата се запознале во Рим преку заеднички пријател, а по венчавката во 2017 година Маруло ди Кондоџани се приклучил на семејната компанија.

Наместо само да се потпираат на приходите од постарите производи, новата генерација одлучила да го промени фокусот на фармацевтскиот бизнис и да вложува повеќе во иновации и лекови за заболувања на мозокот.

Еден од важните чекори беше преземањето на швајцарската биофармацевтска компанија Arvelle Therapeutics во 2021 година, трансакција чија вредност можеше да достигне до 960 милиони долари. Со тоа Angelini ги доби европските права за лек против епилепсија наменет за возрасни пациенти кај кои другите терапии не даваат доволен ефект.

Во 2025 година компанијата направи уште еден чекор, преземајќи од њујоршката Grin Therapeutics права надвор од САД за лек наменет за редок генетски облик на епилепсија. Договорот можеше да достигне вредност до 570 милиони долари.

Angelini во меѓувреме почна да соработува и со Quiver Biosciences, стартап од Кембриџ, Масачусетс, кој користи вештачка интелигенција во развојот на лекови. Фокусот на соработката е насочен кон нови терапии за генетски форми на епилепсија.

Сепак, најголемата промена во стратегијата доаѓа со преземањето на Catalyst Pharmaceuticals за 4,1 милијарди долари.

Американската компанија е специјализирана за ретки болести и на Angelini веднаш му донесе значително присуство на американскиот пазар. Catalyst има три лекови на пазарот, а преземањето на компанијата за италијанската група значи и околу 600 милиони долари дополнителни приходи, што претставува зголемување од приближно 40 проценти.

Најважниот производ на Catalyst е терапија за Lambert-Eaton мијастеничен синдром, редок автоимун невромускулен синдром кој предизвикува мускулна слабост. Во потешки случаи болеста може да предизвика проблеми со голтањето и дишењето.

Станува збор за исклучително ретко заболување. Се проценува дека во светот има околу 30.000 заболени, од кои приближно 400 во САД.

Токму ретките болести се една од областите во кои Angelini гледа голем потенцијал за понатамошен раст. За разлика од масовните терапевтски области, каде што малите фармацевтски компании тешко можат да се натпреваруваат со глобалните гиганти, пазарот на ретки болести е пофрагментиран и остава повеќе простор за специјализирани компании.

Покрај купувањето на Catalyst, групацијата формирала и сопствен фонд за ризичен капитал со 350 милиони долари, наменет за вложување во перспективни биотехнолошки стартапи и компании од областа на животните науки. Меѓу компаниите во кои инвестира фондот е и швајцарскиот Nouscom, кој развива вакцина против рак.

Сепак, патот на семејството Анџелини до денешната позиција не бил без проблеми.

Во 2018 година таткото на Теа Паола, Франческо Анџелини, ѝ го пренел контролниот сопственички удел во компанијата. Подоцна нејзината постара полусестра Марија Џоела Анџелини го оспорила потегот и побарала судот во Велетри да назначи законски старател кој би ги штител интересите на нивниот татко.

Судот во 2022 година ги отфрлил нејзините тврдења. Компанијата тогаш соопшти дека одлуката претставува конечно отфрлање на обвиненијата и дека постапките немале влијание врз управувањето со Angelini Industries.

Семејниот спор привлече значително внимание во италијанската јавност, а весникот La Repubblica конфликтот го спореди со серијата „Далас“, поради сличностите со приказните за богатите семејства и нивните внатрешни борби.

Во меѓувреме, деловната стратегија продолжи да се менува. Angelini сè повеќе се концентрира на невролошките заболувања, особено на епилепсијата, област во која компанијата сака да изгради долгорочна позиција.

Но купувањето на Catalyst е далеку најголемиот чекор во таа стратегија.

Со една трансакција вредна 4,1 милијарди долари, компанијата од традиционална италијанска фармацевтска група се претвори во многу посериозен играч на американскиот пазар. За семејството Анџелини тоа е и обид четвртата генерација да го продолжи растот на бизнисот, но овојпат надвор од границите на Европа.

Плановите, сепак, не завршуваат со Catalyst. Маруло ди Кондоџани веќе најавува дека компанијата мора да продолжи да расте и да бара нови можности.

Така, семејството кое пред повеќе од 100 години започнало со мала аптека во Анкона денес управува со империја вредна милијарди долари и се подготвува за нова фаза. Од италијански семеен бизнис со европски корени, Анџелини сака да стане глобална фармацевтска компанија, а американскиот пазар е клучниот чекор кон таа цел.