Путин повторно се пофали: Русија е четврта економија во светот и прва во Европа

Рускиот претседател Владимир Путин изјави дека руската економија и понатаму се наоѓа меѓу најсилните во светот според бруто домашниот производ пресметан по паритет на куповната моќ, нагласувајќи дека земјата го задржува четвртото место на глобално ниво и првата позиција во Европа.

Говорејќи на средба со пратениците од Државната дума по завршувањето на последната пленарна седница од осмото свикување, Путин оцени дека Русија останува зад Кина, САД и Индија, но пред сите европски економии кога станува збор за овој економски показател.

Според него, руската економија продолжува да бележи повисоки стапки на раст во споредба со Европската Унија, иако призна дека властите би сакале тие да бидат уште повисоки. Истовремено предупреди дека инфлацијата останува еден од главните предизвици и дека постојат ризици од нејзино дополнително зголемување, што може да има последици врз економските текови.

Путин истакна дека најголемата предност на земјата е отпорноста на економскиот и финансискиот систем, за која смета дека овозможува Русија да се справува со надворешните предизвици и истовремено да продолжи со развојот на клучните индустриски гранки.

Тој нагласи дека токму таа стабилност, според него, создава услови за понатамошни инвестиции во индустријата, вклучително и во одбранбениот сектор, како и за спроведување мерки насочени кон решавање на социјалните прашања.

На средбата со пратениците, рускиот претседател им се заблагодари за, како што рече, нивната ефикасна работа и придонесот во зајакнувањето на државниот суверенитет и заштитата на националните интереси.

Изјавите на Путин доаѓаат во период кога руската економија и натаму функционира под силно влијание на меѓународните санкции, а Москва настојува да покаже дека успева да ја одржи економската стабилност и покрај ограничувањата и геополитичките предизвици.