Ворен Бафет откри што смета дека стои зад неговиот огромен успех: „Можеби сум еден од десетте најсреќни луѓе на светот“

Еден од најуспешните инвеститори во историјата, Ворен Бафет, смета дека неговиот животен и деловен успех не се должи само на знаење и дисциплина, туку и на голема доза среќа. Во ретко телевизиско интервју за CNBC, 95-годишниот милијардер изјави дека се чувствува како да е меѓу десетте најсреќни луѓе на планетата.

Според Бафет, самото тоа што е жив и сè уште во добра здравствена состојба на оваа возраст претставува огромна привилегија. Со препознатливата доза хумор рече дека со текот на годините постепено ја губи острината на умот, но дека имал доволно време да го искористи својот потенцијал и да изгради успешна кариера.

Тој истакна дека се чувствува особено среќен што неговата природна дарба и лична страст биле насочени кон инвестирањето – професија која му овозможила да создаде огромно богатство. Според него, доколку талентот го имал во некоја друга област, како на пример музиката, резултатите веројатно немало да бидат финансиски толку значајни.

Бафет нагласи дека една од најголемите животни предности била семејната средина во која растел. Неговиот татко бил берзански брокер, што му овозможило уште како дете да се запознае со светот на инвестициите и финансиските пазари. Тој призна дека оваа околност значително влијаела врз неговиот подоцнежен успех.

„Ако татко ми беше водоинсталатер, немаше да ја имам истата почетна предност“, рече Бафет, нагласувајќи дека многу важни животни околности не зависат од личниот избор, туку од случајноста.

Познатиот инвеститор додаде дека низ животот бил сведок на многу луѓе кои се соочиле со тешки и трагични околности, без самите да бидат виновни за тоа. Според него, тој и неговото семејство имале среќа да ги избегнат многу од тие животни предизвици.

Кариерата на Бафет се смета за една од најуспешните во современата деловна историја. Откако ја презеде компанијата Berkshire Hathaway, тогаш текстилна фирма во финансиски проблеми, ја претвори во конгломерат чија пазарна вредност достигна околу еден трилион долари.

Во периодот од 1965 до 2025 година, акциите на Berkshire Hathaway бележеа просечен годишен раст од речиси 20 проценти, што е приближно двојно подобар резултат од индексот S&P 500 во истиот период. Токму поради ова Бафет често се смета за еден од најголемите инвестициски умови на сите времиња.

Иако неговото богатство денес се проценува на речиси 150 милијарди долари, Бафет во текот на годините донираше повеќе од половина од своите акции во Berkshire Hathaway за хуманитарни цели, останувајќи доследен на својата филозофија дека најголемиот дел од богатството треба да се врати во општеството.

На почетокот на оваа година Бафет се повлече од функцијата главен извршен директор на Berkshire Hathaway, ставајќи крај на една од најдолгите и најуспешни лидерски кариери во корпоративниот свет.

И покрај тоа што неговото име со децении се поврзува со трпеливост, дисциплина и внимателен избор на инвестиции, Бафет смета дека успехот не може целосно да се објасни само со личните квалитети. Тој потсети дека американската економија во изминатите децении обезбедила извонредни услови за инвестирање.

Како пример наведе дека кога ја купил својата прва акција на само 11 години, индексот Dow Jones изнесувал околу 100 поени, додека денес достигнува приближно 52.000 поени. Според него, ваквиот историски раст им помогнал на генерации инвеститори да создадат значително богатство.

Со препознатливата скромност, Бафет заклучи дека бил „во вистинската игра во вистинско време“, оценувајќи дека покрај трудот и дисциплината, животниот успех секогаш е комбинација од знаење, правилни одлуки и среќни околности.