Роботите пристигнуваат на производствените линии: Mitsubishi инвестира во нова генерација автоматизација

Автомобилската индустрија забрзано влегува во нова ера на автоматизација, а јапонскиот производител Mitsubishi прави значаен чекор кон интеграција на хуманоидни роботи во своите производствени процеси. Компанијата најави партнерство со технолошкиот стартап Highlanders, со цел развој и производство на роботи кои во иднина ќе извршуваат дел од задачите во фабриките, со што ќе се зголемат ефикасноста и продуктивноста.

Highlanders е компанија основана врз истражувања развиени на Универзитетот во Токио и е специјализирана за развој на хуманоидна роботика. Mitsubishi веќе вложи капитал во стартапот, а двете страни потпишаа договор за стратешка соработка. Финансиските детали од инвестицијата не се објавени, но компанијата не ја исклучува можноста за дополнителни вложувања во следната фаза од проектот.

За разлика од повеќето автомобилски производители, кои набавуваат индустриски роботи од специјализирани компании, Mitsubishi се одлучи активно да учествува во нивниот развој. Производството на роботите ќе биде организирано во постојните капацитети на компанијата во Кјото, каде што ќе се искористат производствени линии кои моментално не се во функција.

Според плановите, сериското производство би можело да започне во 2027 година, а првичниот капацитет се проценува на околу 1.000 роботи месечно. Доколку проектот се реализира според предвидената динамика, тоа ќе претставува еден од најголемите чекори кон поширока примена на хуманоидни роботи во автомобилската индустрија.

Во почетната фаза роботите ќе бидат ангажирани на задачи како транспорт на делови низ производствените погони и склопување на мотори. Станува збор за операции кои бараат голема прецизност и се повторуваат во текот на целиот производствен процес, што ги прави погодни за автоматизација.

Компанијата наведува дека доколку роботите ги исполнат очекувањата во секојдневното производство, постои можност тие во иднина да бидат понудени и на други индустриски компании, со што Mitsubishi би влегол и на пазарот на напредни роботски решенија.

Од компанијата истакнуваат дека ова е првиот договор од ваков вид меѓу еден автомобилски производител и јапонска компанија специјализирана за развој на хуманоидни роботи наменети за сериско производство.

Најавата повторно ја отвори дебатата за влијанието на автоматизацијата врз работните места. Иако сè почестата примена на роботи во индустријата предизвикува стравувања дека дел од работниците би можеле да бидат заменети, од Mitsubishi нагласуваат дека нивната стратегија не е насочена кон елиминирање на човечкиот фактор.

Наместо тоа, компанијата сака да создаде производствен модел во кој луѓето и роботите ќе работат заедно, при што роботите ќе ги преземаат физички најнапорните и најрутинските задачи, а вработените ќе бидат фокусирани на активности што бараат поголема експертиза, контрола и носење одлуки.

Со оваа инвестиција Mitsubishi се приклучува на растечкиот број светски производители кои гледаат на хуманоидната роботика како на следна голема технолошка трансформација во производството. Ако развојот продолжи според очекувањата, ваквите роботи би можеле да станат составен дел од современите фабрики уште во текот на следната деценија, отворајќи ново поглавје во автоматизацијата на индустријата.