Брисел ја предупреди Meta: Исклучете ги функциите што создаваат зависност или ќе платите високи казни

Европската комисија покрена постапка против Meta, оценувајќи дека Instagram и Facebook можеби ги прекршуваат правилата на Европската унија со функции што ги поттикнуваат корисниците да поминуваат прекумерно време на платформите. Доколку компанијата не ги измени спорните механизми, може да се соочи со високи финансиски казни.

Прелиминарните наоди се резултат на двегодишна истрага спроведена според Законот за дигитални услуги (Digital Services Act), кој им наметнува обврски на најголемите онлајн платформи да ги намалат ризиците што можат да ги предизвикаат врз корисниците, особено врз малолетните лица.

Според Европската комисија, алгоритмите за персонализирани препораки, автоматското репродуцирање видеа и бесконечното скролање создаваат средина што ги охрабрува корисниците да останат на платформите многу подолго отколку што планирале. Регулаторите предупредуваат дека ваквите функции, заедно со Reels и Stories, можат да придонесат за прекумерна или компулсивна употреба на социјалните мрежи.

Брисел смета дека досегашните мерки што Meta ги воведе не обезбедуваат доволна заштита. Алатките за ограничување на времето поминато на платформите, според Комисијата, лесно можат да се игнорираат, додека родителските контроли се премногу сложени за голем дел од корисниците.

Поради тоа, Европската комисија бара автоматската репродукција на содржини и бесконечното скролање да бидат исклучени како стандардна поставка. Дополнително, од компанијата се очекува да воведе поефикасни потсетници за пауза при користење на апликациите и да ги прилагоди алгоритмите така што тие нема првенствено да бидат насочени кон максимално задржување на вниманието на корисниците.

Од Meta ги отфрлаат обвинувањата и тврдат дека европските регулатори не ги земале предвид бројните мерки што компанијата веќе ги вовела за заштита на тинејџерите. Од компанијата посочуваат дека во меѓувреме биле воведени посебни „Teen Accounts“, кои автоматски активираат дополнителни безбедносни поставки, им овозможуваат на родителите да го ограничат користењето на Instagram во текот на ноќта и да постават дневни временски ограничувања.

Европската комисија, сепак, останува на ставот дека сегашниот дизајн на платформите создава ризик од зависност и дека се неопходни дополнителни промени. Доколку Meta не ги исполни барањата, може да следува формална одлука за непочитување на европските правила и парична казна која може да достигне до шест проценти од годишниот глобален приход на компанијата.

Ова не е единствената истрага што Европската унија ја води против Meta. Регулаторите паралелно испитуваат дали алгоритмите на Facebook и Instagram ги вовлекуваат корисниците во таканаречени „rabbit hole“ ефекти, при што препораките постојано нудат слични содржини и ги задржуваат луѓето на платформите подолг временски период. Дополнително, Комисијата веќе побара компанијата да преземе поефикасни мерки за да спречи деца помлади од 13 години да отвораат профили на нејзините социјални мрежи.

Случајот против Meta се надоврзува на сличната постапка што Европската унија претходно ја покрена и против TikTok. Во меѓувреме, во Брисел се разгледуваат и дополнителни мерки за заштита на младите корисници, а се очекува експертски препораки што би можеле да отворат пат за пошироки ограничувања или забрани за користење социјални мрежи од страна на тинејџерите на ниво на целата Европска унија.