Цукерберг признава: развојот на AI агентите во Meta оди побавно од очекуваното

Извршниот директор на Meta, Марк Цукерберг, призна дека развојот на таканаречените AI агенти во компанијата се одвива побавно од очекуваното, што претставува значаен пресврт во амбициозната стратегија на технолошкиот гигант за вештачка интелигенција.

Според информации од внатрешен состанок на компанијата, Цукерберг им рекол на вработените дека системите базирани на AI агенти, односно автоматизирани алатки кои извршуваат задачи во име на корисникот, не напредувале со темпото што било предвидено во претходните планови. Тој додал дека дел од организациските промени и реструктурирање на компанијата, кои вклучуваа и масовни отпуштања, не биле спроведени на најефикасен начин и дека временската рамка за нивниот ефект била погрешно проценета.

Во рамки на реструктурирањето, Meta претходно намали околу 10 проценти од својата глобална работна сила и прераспредели илјадници вработени во тимови фокусирани на вештачка интелигенција. Овие потези беа дел од поширока стратегија за зголемување на инвестициите во AI инфраструктура и подобрување на продуктивноста преку автоматизација, но предизвикаа и незадоволство кај дел од вработените.

Закерберг посочил дека очекува забележливи резултати од AI инвестициите во период од три до шест месеци, нагласувајќи дека компанијата сè уште верува во долгорочниот потенцијал на оваа технологија, и покрај побавниот почеток од очекуваното.

Во дискусијата било споменато и дека раководството на Meta претходно било под влијание на големиот оптимизам околу новите AI алатки, вклучувајќи и решенија како Claude Code од Anthropic, кои во индустријата се сметаат за важен дел од новата генерација на програмски асистенти.

Паралелно со овие изјави, технолошкиот директор на Meta, Ендру Босворт, информирал дека компанијата ја разгледува употребата на контроверзна алатка за следење на активноста на вработените, која вклучува мониторинг на движењата на глувчето и дигиталното однесување со цел обука на AI системи. Оваа програма била привремено суспендирана поради безбедносна проверка, откако се појавиле прашања околу можен пристап до чувствителни податоци.

Босворт истакнал дека, доколку програмата биде повторно активирана, таа ќе функционира исклучиво на доброволна основа, со можност вработените сами да одлучат дали сакаат да учествуваат.

Иако Meta вложува десетици милијарди долари во развој на вештачка интелигенција, вклучувајќи и инфраструктурни инвестиции што се проценуваат на над 100 милијарди долари, последните изјави од раководството укажуваат дека патот до целосно функционални и широко применливи AI агенти е подолг и покомплексен од првично очекуваното.