Volkswagen размислува за затворање на четири фабрики во Германија, загрозени над 45.000 работни места

Германскиот автомобилски гигант Volkswagen разгледува можност за затворање на четири свои производствени погони во Германија, во обид да одговори на сè посилната конкуренција од кинеските производители на автомобили и промените на глобалниот автомобилски пазар. Доколку планот биде реализиран, во прашање би можеле да бидат повеќе од 45.000 работни места, покрај претходно договорените намалувања на бројот на вработени.

Според информации од извори запознаени со процесот, компанијата анализира затворање на фабриките во Емден, Хановер, Цвикау и фабриката на Audi во Некарсулм. Овој потег би претставувал едно од најголемите преструктурирања во поновата историја на Volkswagen, кој веќе во 2024 година договори значително намалување на работната сила со синдикатите.

Фабриката во Емден е една од најважните производствени локации на Volkswagen во покраината Долна Саксонија. Основана е во 1964 година, а во последните години целосно се пренасочи кон производство на електрични модели од семејството ID. Во погонот работат повеќе од 7.700 луѓе, а во текот на минатата година таму биле произведени околу 147.000 возила.

Хановер, кој претставува историски значајна фабрика за брендот, вработува околу 14.000 лица. Токму таму започна производството на легендарниот модел Bulli во средината на минатиот век, а денес од производствените линии излегуваат најновите генерации на моделите од T-серијата, како и електричниот ID. Buzz. Освен склопување возила, фабриката произведува и компоненти за останатите брендови во рамките на групацијата.

Меѓу фабриките што се разгледуваат за затворање е и погонот на Audi во Некарсулм, каде што работат повеќе од 15.000 вработени. Оваа локација има клучна улога во производството на модели со бензински и хибриден погон, но и на целосно електрични возила, меѓу кои е и Audi e-tron GT. Воедно, таму се наоѓа и седиштето на Audi Sport.

Цвикау, пак, е една од најважните фабрики на групацијата за производство на електрични автомобили. Од 2020 година таму целосно престана производството на возила со мотори со внатрешно согорување, а производствените капацитети се пренасочени кон електрични модели на Volkswagen, Audi и Cupra. Во фабриката работат околу 8.000 лица, а таму се произведуваат и каросериски елементи за луксузните модели Bentley Bentayga и Lamborghini Urus.

Разгледувањето на овие мерки доаѓа во период кога европските производители на автомобили се соочуваат со силен притисок од кинеските компании, кои со пониски производствени трошоци и агресивна експанзија освојуваат сè поголем удел на глобалниот пазар на електрични возила.

Иако од Volkswagen засега нема официјална потврда за конечна одлука, евентуалното затворање на четирите фабрики би имало значително економско и социјално влијание врз регионите во кои тие работат, но и врз целокупната германска автомобилска индустрија, која веќе неколку години се наоѓа во процес на длабока трансформација.