„Ферари“: Клиентите нема да мора да купуваат EV за пристап до ексклузивни автомобили

Ферари нема да бара од клиентите да го купат својот нов електричен модел Luce како услов за пристап до идните ограничени серии на луксузни автомобили, соопшти директорот за маркетинг и комерцијални операции Енрико Галијера, отфрлајќи претходни медиумски тврдења дека ваква практика би можела да стане дел од политиката на компанијата.

На презентација на производот одржана минатата недела, Галијера демантираше извештаи на Bloomberg дека купувањето на моделот Luce, првиот целосно електричен автомобил на компанијата со цена од околу 550.000 евра, би можело да стане предуслов за добивање право на купување на најексклузивните идни модели на брендот. Тој оцени дека воведување ваков притисок врз клиентите би претставувало „голема грешка“.

Според него, ваков пристап би можел да има спротивен ефект и да создаде незадоволни купувачи кои подоцна би го критикувале автомобилот и би влијаеле негативно врз неговата репутација на секундарниот пазар. Тоа, како што наведе, би ја нарушило и неговата вредност при препродажба, што е особено чувствителна тема во сегментот на луксузни електрични возила.

Ферари традиционално користи систем на распределба на возила, особено за лимитирани серии, при што предност имаат постоечки клиенти, сопственици на повеќе автомобили од брендот, како и купувачи кои редовно учествуваат во настани на фабриката и ги задржуваат возилата подолг период. Според податоци на компанијата, поголемиот дел од продажбите веќе се однесуваат на постоечки клиенти, а значителен дел од нив поседуваат повеќе од едно Ферари возило.

Галијера нагласи дека политиката на компанијата останува фокусирана на тоа автомобилите да се продаваат на купувачи кои навистина се заинтересирани за конкретниот модел, а не на оние кои би го купиле од стратешки причини поврзани со идни привилегии. Тој додаде дека компанијата сака да избегне ситуација во која клиентите би купувале возила само за да добијат пристап до други модели.

Новиот електричен модел Luce, претставен минатиот месец, веќе предизвика поделени реакции во јавноста и меѓу фановите на брендот, особено поради неговиот дизајн и фактот дека Ферари постепено се оддалечува од традиционалните бензински мотори. Дел од критиките на социјалните мрежи се однесуваат на изгледот на возилото, кој се разликува од препознатливиот агресивен стил на брендот.

И покрај тоа, извршниот директор Бенедето Виња претходно изјави дека интересот за Luce е силен и кај нови и кај постоечки клиенти. Компанијата засега не објавува официјални податоци за нарачките, најавувајќи дека тие ќе бидат соопштени на крајот на јули, кога ќе бидат објавени и резултатите за вториот квартал.