Apple подготвува нова генерација iPhone Air со втора камера и подобра батерија

Apple Inc. работи на втората генерација на својот iPhone Air, моделот со потенок дизајн кој треба да се појави на пазарот напролет 2027 година, со цел да ја зајакне неговата привлечност кај корисниците. Според извори запознаени со развојот на уредот, новиот модел, познат под кодното име V62, веќе се наоѓа во напредна фаза на тестирање во рамките на компанијата.

Една од најзначајните промени кај прототипите е воведувањето на дополнителна задна камера со ултраширок агол, што би претставувало големо унапредување во однос на сегашната верзија која има само една камера. И покрај овие измени, дизајнот на уредот во голема мера ќе го задржи препознатливиот тенок изглед кој го одликува првата генерација.

Компанијата истовремено работи и на подобрување на траењето на батеријата, која беше една од главните забелешки кај корисниците. Засега не е јасно дали тоа ќе се постигне преку поголем капацитет на батеријата, што би било предизвик поради компактната конструкција, или преку поефикасни хардверски решенија.

iPhone Air, првпат претставен во септември 2025 година, е дел од пошироката стратегија на Apple за проширување на својата iPhone понуда, која годишно носи приходи од над 200 милијарди долари. Во наредниот период компанијата планира и воведување на првиот преклоплив телефон, како и специјален модел по повод 20-годишнината од iPhone, кој би требало да се појави во 2027 година.

Според новиот план, Apple ќе го промени и досегашниот модел на претставување на своите телефони. Наместо сите главни уреди да бидат лансирани во септември, компанијата ќе воведе фазно објавување. Така, оваа година есенската понуда ќе биде фокусирана на Pro моделите и новиот преклоплив телефон, додека стандардниот iPhone 18 и новиот iPhone Air ќе бидат претставени околу шест месеци подоцна.

Новиот Air ќе користи верзија на процесорот A20 Pro, истиот чип кој ќе се применува и кај претстојните премиум модели. Ова треба да придонесе за подобри перформанси и поголема енергетска ефикасност.

И покрај технолошките унапредувања, Apple се соочува со предизвик да ги балансира дизајнот и функционалноста. Тенка конструкција остава ограничен простор за напредни компоненти, што особено влијае на камерите и батеријата, две области кои корисниците најчесто ги посочуваат како најслаби точки.

Компанијата гледа на iPhone Air како на производ кој треба да понуди алтернатива на Pro моделите, наменета за корисници кои сакаат полесен и поелегантен уред, без потреба од сите напредни функции. Оваа стратегија е дел од поширокиот обид на Apple да го диверзифицира својот портфолио на смартфони и да го задржи растот на клучниот iPhone бизнис.