Бројот на Македонци во Германија надмина 161.000 – трендот на иселување продолжува

Бројот на македонски државјани кои живеат и работат во Германија продолжува да расте, покажуваат најновите податоци на германскиот Федерален завод за статистика. Според официјалните евиденции, заклучно со декември минатата година во Германија биле регистрирани 161.120 македонски државјани со статус на странци, што претставува зголемување од нешто повеќе од 2.000 лица во однос на 2024 година, кога нивниот број изнесувал 158.995.

Трендот на иселување е континуиран веќе подолг период. Во последната деценија, од 2015 до 2025 година, бројот на македонски државјани во Германија е зголемен за повеќе од 65.000 лица, што укажува на стабилен и постојан одлив на работна сила од земјата кон една од најсилните европски економии.

Овие податоци ја потврдуваат долгорочната тенденција Германија да остане една од главните дестинации за македонските граѓани кои бараат подобри работни услови, повисоки плати и поголема професионална сигурност. Најчесто станува збор за млади луѓе и семејства кои по преселбата остануваат трајно, при што дел од нив таму ги оформуваат и своите нови домови.

Економските аналитичари ваквиот тренд го поврзуваат со недостигот на квалификувана работна сила во Македонија, но и со силната побарувачка за работници во Германија, особено во секторите како здравство, градежништво и услужни дејности. Дополнително, олеснетите услови за вработување за граѓани од Западен Балкан во изминатите години придонеле за забрзување на миграциските текови.

Иако дел од иселувањето има привремен карактер, се повеќе случаи покажуваат дека престојот се претвора во долгорочен или траен, што дополнително го поставува прашањето за демографските и економските последици за Македонија во наредните години.