Microsoft претстави „Scout“ – AI асистент што работи како виртуелен вработен во корпоративните системи

Microsoft Corp. ја проширува својата понуда на алатки базирани на вештачка интелигенција со нов софтвер што функционира како постојано активен виртуелен извршен асистент, означувајќи нов чекор во интеграцијата на AI во работните процеси на компанијата.

Новиот систем, наречен Scout, ќе биде интегриран директно во интерните е-пошта и календарски системи и ќе се однесува како уште еден „вработен“ во организацијата, наместо како класичен дигитален бот што реагира само на барање на корисникот. За разлика од алатки како ChatGPT или Microsoft Copilot, кои се активираат преку директна интеракција, Scout е дизајниран да работи автономно и континуирано во позадина.

Според Чарлс Ламанa, кој раководи со развојот на бизнис апликациите и работните AI системи во Microsoft, новиот асистент може самостојно да извршува поширок опсег на задачи. Како пример, тој наведе ситуации во кои Scout би можел автоматски да предложи или да побара поместување на состанок доколку се појави временски конфликт, без потреба од директна интервенција на корисникот.

Системот е замислен да има и сопствена дигитална „идентитетска“ улога во организацијата, што овозможува негово споделување и комуникација помеѓу вработените. Во пракса, тоа значи дека, на пример, продажни тимови би можеле да комуницираат со Scout на нивниот менаџер за да добијат информации или насоки, како да се работи за реален асистент.

Microsoft го претстави проектот на својата годишна конференција Build во Сан Франциско, каде компанијата демонстрира нови начини за примена на вештачка интелигенција во своите софтверски производи. Лансирањето доаѓа во момент кога компанијата се обидува да ја зајакне својата позиција на пазарот, каде се соочува со забавено усвојување на Copilot и засилена конкуренција во сегментот на AI алатки.

За разлика од конкурентските решенија на Anthropic PBC и OpenAI, кои исто така развиваат напредни AI асистенти со можност за директна контрола на уреди, Microsoft се обидува да се диференцира преку длабока интеграција во сопствениот екосистем на производи и корпоративни алатки.

Според компанијата, Scout е изграден врз платформа која овозможува моделите зад системи како ChatGPT и Claude да функционираат како постојано активни агенти. Внатрешно, проектот бил познат под кодното име Project Lobster, а претходно предизвикал и дебати околу безбедноста, поради можноста ваквите системи да имаат поширок пристап до кориснички уреди и податоци.

Microsoft засега не објави конечна цена за користење на Scout, но се очекува услугата првично да биде достапна преку претплата за GitHub Copilot. Компанијата најавува модел на наплата базиран на користење, додека во иднина размислува за вклучување на вакви AI функции во пошироки пакет претплати, како дел од својата стратегија за монетизација на вештачката интелигенција.