Boeing добива сигнал од FAA: новите MAX модели блиску до одобрување

Федералната администрација за воздухопловство (FAA) очекува сертификација на новите модели на Boeing 737 MAX 7 и MAX 10 во текот на оваа и следната година, што би можело да претставува значаен чекор за американскиот авионски производител по долг период на одложувања и регулаторни ограничувања.

Шефот на FAA, Брајан Бедфорд, изјави дека се очекува моделот 737 MAX 7 да добие одобрение во текот на летото, додека поголемиот MAX 10 би можел да биде сертифициран до крајот на годината. Тој додаде дека регулаторот го поддржува планот на Boeing постепено да го зголеми производството на моделот 737 MAX од сегашните 42 на 47 авиони месечно.

Бедфорд истакна дека во наредните месеци може да се очекува и понатамошно зголемување на производствените капацитети, нагласувајќи дека стабилноста и квалитетот во производството се клучни за идниот напредок на компанијата.

Boeing претходно доби дозвола од FAA да го зголеми темпото на производство на 42 авиони месечно, по претходно воведено ограничување по инцидентот со Alaska Airlines во 2024 година, кога дојде до проблем во лет со еден од авионите од серијата MAX.

Компанијата планира дополнително проширување на производството до 52 авиони месечно во почетокот на следната година, со отворање на нова производствена линија во државата Вашингтон.

Сертификацијата на моделите MAX 7 и MAX 10 е одложувана поради технички проблеми поврзани со системот за одмрзнување на моторите, а Boeing во меѓувреме се соочува и со доцнења во развојот на моделот 777X.

Извршниот директор на Boeing, Кели Ортберг, изрази уверување дека процесот на тестирање се одвива без поголеми проблеми и дека компанијата се приближува кон завршната фаза на сертификација.

Од FAA порачаа дека клучно за идниот напредок е Boeing да го подобри квалитетот во производството уште во фабриките, наместо да се реагира на проблеми откако ќе се појават, нагласувајќи зголемена транспарентност и заедничка работа меѓу регулаторот и производителот.