Ferrari ја отвори електричната ера: Luce пристигнува со потпис на Џони Ајв

Ferrari влегува во нова ера со претставувањето на Luce, првиот целосно електричен модел во историјата на легендарниот италијански бренд. Автомобилот не привлекува внимание само поради електричниот погон и високите перформанси, туку и поради необичната соработка со дизајнерското студио LoveFrom, зад кое стојат поранешниот главен дизајнер на Apple, Џони Ајв, и индустрискиот дизајнер Марк Њусон.

Ferrari со овој проект направи значително отстапување од својата традиционална филозофија, ставајќи го корисничкото искуство во центарот на развојот. Наместо целосна дигитализација на контролите, како што е тренд кај голем број модерни автомобили, Luce комбинира дигитални екрани со класични физички команди. Целта е возачот да има поинтуитивно и побезбедно управување без непотребно одвлекување на вниманието од патот.

Токму овој пристап бил една од главните идеи на Џони Ајв, кој јавно предупреди дека претераното потпирање на екрани на допир во современите автомобили може негативно да влијае врз безбедноста во сообраќајот. Во Luce, Ferrari се обидува да најде рамнотежа меѓу модерната технологија и практичната употребливост.

Покрај редизајнираниот ентериер, автомобилот доби и нов аеродинамичен изглед со нагласено низок отпор на воздухот. Вграден е и активен систем што автоматски го спушта предниот дел на возилото при повисоки брзини за подобра стабилност и ефикасност.

Luce воедно е и најпространиот Ferrari досега. Наместо класичната конфигурација со две седишта, новиот модел располага со четири врати и пет седишта, со значително поголем простор за патниците и багажот. Со тоа компанијата очигледно сака да привлече и купувачи кои бараат комбинација од спортски перформанси и секојдневна практичност.

И покрај фокусот на удобноста и технологијата, Ferrari не се откажува од својата спортска ДНК. Luce е опремен со четири електромотори кои заедно испорачуваат повеќе од 1.000 коњски сили. Автомобилот забрзува до 100 километри на час за само 2,5 секунди, додека максималната брзина достигнува 310 километри на час.

Енергијата ја обезбедува батерија од 122 kWh со 800-волтна архитектура, што овозможува автономија поголема од 530 километри со едно полнење. Ferrari нагласува и дека при производството бил користен голем удел рециклиран алуминиум, како дел од пошироката стратегија за одржлив развој.

Со Luce, Ferrari јасно покажува дека иднината на суперспортските автомобили може да биде електрична, без притоа да се жртвуваат перформансите, препознатливиот дизајн и возачкото искуство по кое брендот е познат со децении.