SpaceX и xAI купиле Tesla производи вредни стотици милиони долари

Tesla остварила приходи од околу 890 милиони долари преку деловни зделки со компаниите SpaceX и xAI од 2023 година наваму, што дополнително ја покажува тесната поврзаност меѓу бизнисите на Илон Маск.

Податоците беа објавени во документација поврзана со планираното излегување на SpaceX на берза, каде што се открива дека дел од приходите на Tesla доаѓаат од продажба на возила и енергетски системи на другите компании во империјата на Маск.

Меѓу позначајните трансакции се издвојува набавката на Cybertruck возила во вредност од околу 131 милион долари од страна на SpaceX и xAI во текот на минатата година. Сепак, најголемиот дел од приходите произлегуваат од продажбата на Megapack батериски системи за складирање енергија, кои Tesla ги испорачува на xAI. Само во 2025 година овие договори достигнале вредност од над 500 милиони долари.

xAI, компанијата фокусирана на развој на вештачка интелигенција, беше преземена од SpaceX претходно оваа година, што дополнително ја продлабочи интеграцијата меѓу компаниите под контрола на Маск.

Бизнисите на милијардерот со години функционираат во тесна координација преку заеднички инвестиции, деловни договори и инвеститорска структура. Во одредени случаи тие делат и вработени, а во тек е и заеднички проект за фабрика за производство на полупроводници позната под името „Terafab“.

Во истата документација беше објавено и дека во одборот на директори на SpaceX ќе се приклучат Ира Еренпрајс, долгогодишен член на управниот одбор на Tesla, како и инвеститорот Ренди Глејн, кој соработува со компанијата уште од нејзините рани фази.

Покрај Tesla, SpaceX и xAI, Илон Маск управува и со The Boring Company и Neuralink, создавајќи мрежа од меѓусебно поврзани технолошки компании кои опфаќаат автомобилска индустрија, вселенска технологија, вештачка интелигенција и невротехнологија.

Сè поголемата вредност на овие компании дополнително го зацврстува статусот на Маск како еден од најбогатите луѓе во светот, додека неговиот бизнис модел сè повеќе се потпира на синергијата меѓу сопствените компании.