Мајкрософт вложил над 100 милијарди долари во партнерството со OpenAI

Технолошкиот гигант Microsoft досега инвестирал повеќе од 100 милијарди долари во партнерството со OpenAI, потврди претставник на компанијата за време на судскиот процес што го покрена милијардерот Elon Musk против двете компании.

Според сведочењето на директорот за деловни договори во „Мајкрософт“, Michael Wetter, сумата ги опфаќа директните инвестиции во „ОпенАИ“, како и огромните трошоци за изградба на инфраструктура и обезбедување компјутерски капацитети преку облачната платформа „Азур“. Дел од средствата биле вложени уште пред компанијата да почне да остварува приходи од соработката.

Сведочењето беше дадено во рамки на судскиот спор што се води во федерален суд во Калифорнија, каде Маск ја обвинува „ОпенАИ“ дека се оддалечила од првичната мисија да развива вештачка интелигенција во корист на човештвото, претворајќи се во профитно ориентирана компанија. Во тужбата се наведува дека „Мајкрософт“ активно помогнал во таа трансформација.

Маск, кој е еден од коосновачите на „ОпенАИ“, тврди дека раководството на компанијата, предводено од Sam Altman и Greg Brockman, ја напуштило оригиналната визија на организацијата. Од друга страна, „ОпенАИ“, „Мајкрософт“ и нивните директори ги отфрлаат обвинувањата, оценувајќи ги како обид на Маск да му наштети на конкурентскиот бизнис и да ја зајакне сопствената AI-компанија xAI.

„Мајкрософт“ инвестираше околу 13 милијарди долари во „ОпенАИ“ до почетокот на 2023 година и стана главен технолошки партнер на компанијата зад „ЧетГПТ“. Во меѓувреме, вредноста на „ОпенАИ“ експлозивно порасна и според последните проценки достигна околу 852 милијарди долари.

Извршниот директор на „Мајкрософт“ Satya Nadella неодамна изјави дека компанијата очекува огромен финансиски поврат од раните инвестиции во „ОпенАИ“. Според него, ризикот што го презеле на почетокот се покажал како исклучително исплатлив.

Иако партнерството меѓу двете компании останува клучно за развојот на вештачката интелигенција, односите во последниот период стануваат посложени бидејќи „Мајкрософт“ и „ОпенАИ“ сè почесто се појавуваат и како директни конкуренти на пазарот. Како дел од реструктурирањето на „ОпенАИ“, „Мајкрософт“ доби и значителен сопственички удел во компанијата, што дополнително ја зацврсти нивната деловна поврзаност.