Netflix инвестирал над 135 милијарди долари во филм и серии во последната деценија

Netflix објави дека во изминатата деценија инвестирала повеќе од 135 милијарди долари во филмови и телевизиски серии, со што дополнително ја потврдува својата доминантна позиција на глобалниот пазар на стриминг и растечкото значење на содржините „на барање“.

Компанијата со седиште во Лос Гатос, Калифорнија, соопшти дека во истиот период придонела со над 325 милијарди долари во светската економија и поддржала создавање на повеќе од 425.000 работни места поврзани со продукција на филмска и телевизиска содржина. Овие бројки, како што наведуваат од Netflix, го прикажуваат поширокото економско влијание на платформата, далеку надвор од самата индустрија за стриминг.

Денес Netflix има повеќе од 325 милиони претплатници, а компанијата се смета за една од клучните сили во трансформацијата на начинот на кој публиката консумира видео содржини. Во последната деценија, платформата инвестираше во оригинални продукции кои значително влијаеја врз популарната култура на глобално ниво.

Коизвршниот директор на Netflix, Ted Sarandos, изјави дека компанијата го лансира таканаречениот „Netflix Effect“, иницијатива со која се анализира економското, културното и социјалното влијание на нивните филмови и серии. Според него, ефектот се чувствува континуирано низ различни индустрии и пазари, од недела во недела и од година во година.

Netflix посочи дека има лиценцирано содржини од повеќе од 3.000 компании ширум светот, вклучувајќи и јавни радиодифузери, што дополнително ја проширува неговата содржинска мрежа. Во последните години значително се зголемила и популарноста на неанглиските продукции, кои сега сочинуваат повеќе од една третина од вкупната гледаност, во споредба со помалку од десет проценти пред една деценија.

Глобалниот успех на наслови како „Money Heist“, „Squid Game“ и „KPop Demon Hunters“ покажува дека интернационалните продукции сè повеќе доминираат во стриминг индустријата.

Во меѓувреме, коосновачот и претседател на компанијата Reed Hastings неодамна најави повлекување од активното раководење, во период кога Netflix бара нови извори на раст преку развој на гејминг и содржини во живо, додека истовремено се соочува со забавување на растот на приходите.