Филмски сензација на годината: Ѓаволот носи Прада 2 руши очекувања на благајните

Филмот The Devil Wears Prada 2 постигна силен глобален бокс-офис старт, заработувајќи околу 233 милиони долари во првиот викенд на прикажување, со што се вброи меѓу најголемите премиери годинава. Новото продолжение, во продукција на The Walt Disney Company, го предводат актерките Мерил Стрип и Ен Хатавеј, кои повторно ги толкуваат главните улоги.

Во САД и Канада, филмот оствари околу 77 милиони долари од продажба на билети, што е резултат блиску до првичните проценки на индустриските аналитичари. Иако некои прогнози очекуваа повисок старт, конечниот резултат сепак ги надмина очекувањата на дел од студијата, кои предвидуваа поскромен опсег за отворањето.

Особено силен интерес беше забележан на меѓународните пазари, каде што филмот привлече широка публика. Во Италија, на пример, оствари еден од петте најуспешни отвори во историјата на киното, што дополнително ја потврдува глобалната привлечност на франшизата.

Ова продолжение доаѓа две децении по оригиналниот филм, кој во своето време постигна голем комерцијален успех. Новото издание веќе ги надмина почетните резултати на оригиналот, а студиото посочува дека интересот е дополнително зголемен и од повторното гледање на првиот филм на стриминг платформите во периодот пред премиерата.

Аналитичарите истакнуваат дека успехот е особено значаен бидејќи драмеди жанрот ретко остварува вакви резултати на глобално ниво. Публиката на филмот е претежно женска, што ја потврдува силната комерцијална моќ на овој демографски сегмент во киноиндустријата.

Во филмот се враќаат и други познати актери од оригиналот, меѓу кои Стенли Тучи и Емили Блант, што дополнително придонесе за интересот на публиката. Според податоците од индустријата, ова е еден од најуспешните отвори во кариерата на Мерил Стрип, која зад себе има низа големи филмски успеси.

Со ваков старт, продолжението на „The Devil Wears Prada“ се позиционира како еден од најуспешните филмски наслови на годината и значаен доказ за долготрајната популарност на оригиналната приказна.