Биткоин се соочува со отпор околу 80.000 долари поради притисок од пазарот

Биткоин последниве денови се движи околу нивото од 80.000 долари, но има потешкотии да го пробие овој праг, при што пазарните аналитичари посочуваат дека дел од причината лежи во сложени движења на пазарот на опции.

Најголемата крипто берза за деривати Deribit бележи зголемена концентрација на кол-опции со цена од 80.000 долари, што создава специфичен притисок врз пазарот. Овие договори носат исплата само доколку цената на биткоинот го надмине зададеното ниво, па нивната голема концентрација практично создава зона на отпор. Трговците кои ги продале овие опции ги инкасираат премиите однапред, но пазарните креатори од другата страна се принудени да ги хеџираат позициите со продавање биткоин при раст на цената, што дополнително го забавува движењето нагоре.

Овој механизам, познат како „long gamma“, создава ефект на својеврсна ценовна бариера, каде што секој обид за пробив над 80.000 долари наидува на зголемена продажна активност. Според аналитичари, токму ова е една од причините зошто биткоинот, и покрај растот од над 12 проценти од крајот на март, сè уште не успева да се стабилизира над ова ниво.

Дополнително, моменталниот пазарен сентимент не е особено еуфоричен. Иако институционалниот интерес останува стабилен преку фондови, инфраструктура за токенизација и континуирани купувања од одредени компании, недостасува силната малопродажна побарувачка која во претходните циклуси го движеше биткоинот кон рекордни нивоа над 120.000 долари.

Аналитичарите посочуваат дека дел од трговците продаваат кол-опции токму на нивото од 80.000 долари, сметајќи дека цената тешко ќе се задржи над тој праг во блиска иднина, што дополнително го засилува притисокот. Податоците покажуваат значителна отворена позиција во договори со истекување во мај и јуни, што укажува дека ова ниво може да остане клучна точка на отпор барем во наредните недели.

И покрај тоа, дел од експертите предупредуваат дека опционите позиции не се единствениот фактор и дека дел од движењето е резултат и на реализирање профит од страна на инвеститорите при приближување до оваа цена.

Во исто време, зголемената нестабилност на глобалните финансиски пазари, особено акциите, се прелева и на крипто секторот, што дополнително придонесува за странично движење на биткоинот. Аналитичарите оценуваат дека во вакви услови, цената може да остане „заклучена“ околу 80.000 долари сè додека не се појави посилен нов бран на побарувачка или значаен надворешен катализатор.