Threads воведува „Live Chats“ за разговори во реално време за спорт и културни настани

Платформата Threads, во сопственост на Meta, воведува нова функција наречена „Live Chats“ која овозможува разговори во реално време околу актуелни културни и спортски настани. Компанијата соопшти дека целта на новата алатка е да ја направи апликацијата поинтерактивна, понавремена и порелевантна за корисниците кои сакаат да следат и коментираат настани додека се случуваат.

Првата примена на функцијата ќе биде поврзана со NBA заедницата на Threads за време на плејоф натпреварите, каде одредени медиумски личности ќе бидат домаќини на разговорите во живо. Меѓу најавените водители се Малика Ендрјус, Рејчел Николс и Да Кид Гоуи, кои ќе ги водат дискусиите паралелно со натпреварите.

Во почетната фаза, пристапот до креирање Live Chats ќе биде ограничен на помала група креатори, додека останатите корисници ќе можат постепено да ја добијат можноста во иднина. Сепак, секој ќе може да учествува во веќе отворени разговори, со тоа што до 150 корисници ќе имаат можност активно да испраќаат пораки, фотографии, видеа, линкови и реакции со емотикони. По достигнување на овој лимит, дополнителните учесници ќе можат само да ја следат дискусијата, да реагираат и да учествуваат во анкети во режим на набљудувач.

Од Meta објаснуваат дека Live Chats се замислени како начин за градење заедници околу заеднички интереси, како спортски натпревари, издавање музички албуми или други големи културни настани кои се одвиваат во реално време. Функцијата е дизајнирана да биде подинамична од класичните групни разговори, бидејќи се фокусира на тековни настани и моментални реакции.

Корисниците ќе можат да се приклучат на Live Chats директно од заеднички фид, преку објави во главниот фид или со кликнување на означената икона на профилот на домаќинот. Иако разговорите имаат временско ограничување, тие ќе останат јавно достапни и по нивното завршување.

Во однос на безбедноста и модерацијата, Meta соопшти дека системот автоматски ќе ги отстранува пораките што ги прекршуваат правилата на платформата, додека учесниците ќе можат да пријавуваат содржина. Домаќините, пак, ќе имаат алатки за контрола во реално време, вклучувајќи можност да ги преместат корисниците во режим на набљудувач или целосно да ги отстранат од разговорот.

Компанијата најави и дополнителни надградби на функцијата во иднина, меѓу кои се ко-домаќини, ажурирања во живо за текот на настаните, интеграција со заклучен екран и можност за споделување и цитирање на пораки директно во објавите на Threads.

Со оваа новина, Threads се обидува да ја зајакне својата позиција во однос на конкуренцијата и да понуди поразвиена платформа за следење настани во реално време, нешто што со години претставува силна страна на конкурентските социјални мрежи.