Судир меѓу Лондон и OpenAI по стопирањето на инвестиција за AI инфраструктура во Велика Британија

Велика Британија се најде во судир со OpenAI откако компанијата одлучи да го стопира својот голем проект за центар за податоци во земјата, потег што предизвика критики од британските власти и отвори нова дебата за условите за инвестиции во вештачка интелигенција.

Британскиот министер за вештачка интелигенција и онлајн безбедност Kanishka Narayan изјави дека причините наведени од OpenAI, поврзани со цената на енергијата и регулативата, не се промениле во последниот период. Според него, реалните услови на терен остануваат исти, што ја доведува во прашање аргументацијата за повлекувањето на инвестицијата.

Наместо тоа, тој укажа дека одлуката најверојатно е поврзана со внатрешни финансиски предизвици на компанијата, особено во контекст на нејзините амбициозни планови за огромни инвестиции во инфраструктура за вештачка интелигенција, вредни над еден трилион долари. Во таа насока се споменува и повлекувањето или одложувањето на дел од плановите поврзани со слични проекти во други земји.

OpenAI неодамна соопшти дека го паузира проектот „Stargate UK“, кој беше замислен како дел од поширока глобална мрежа на инфраструктура за вештачка интелигенција. Компанијата наведе дека ќе чека „соодветни услови“ во однос на регулативата и трошоците за енергија, кои во Обединетото Кралство се меѓу највисоките во Европа. Проектот првично беше најавен како заедничка иницијатива со Nvidia Corp. и развивачот на дата центри Nscale.

Овој потег претставува удар за британската влада, која ја гледа вештачката интелигенција како клучен двигател на идниот економски раст. Планот предвидуваше изградба на голем центар за податоци во северна Англија како дел од пошироката стратегија за „AI Growth Zones“, региони во кои државата би субвенционирала енергија за технолошки инвестиции.

Иако OpenAI не наведе конкретни регулативи како главна пречка, извори упатуваат дека прашањата околу авторските права одиграле значајна улога. Во Обединетото Кралство, користењето заштитени дела за обука на AI модели бара претходна дозвола, што компанијата го смета за ограничувачки фактор во однос на практиките во други земји.

Дебатата околу овие правила дополнително се засили по отпорот од дел од креативната индустрија, меѓу кои и познати уметници, кои се спротивставија на полиберални предлози за користење авторски материјали. Владата засега нема конечен план за промена на законите, но најавува дека работата на нови решенија продолжува.

Во исто време, британските власти објавија и нови инвестиции преку државен фонд за вештачка интелигенција, со што се обидуваат да ја задржат динамиката на развојот на секторот. Сепак, случајот со OpenAI отвора пошироко прашање за рамнотежата меѓу регулацијата, трошоците и способноста на земјата да привлече големи технолошки проекти.