Nike во преговори со УЕФА за преземање на спонзорството на топките од Adidas

Nike е во ексклузивни преговори со европските фудбалски институции за да стане официјален снабдувач на топки за натпреварите под капата на УЕФА, со што би го заменил долгогодишниот партнер Adidas, кој ја извршуваше оваа улога во изминатите 25 години. Според информации од индустријата, договорот би стапил на сила во периодот од 2027 до 2031 година.

Преговорите ги води заедничката организација UC3, формирана од УЕФА и здружението на европските клубови, која ги координира комерцијалните права за натпреварувањата. Од Nike потврдија дека разговорите се во тек, но без да откријат конкретни детали, додека Adidas соопшти дека нема намера да го продолжи постојниот договор.

Според неофицијални проценки, вредноста на потенцијалниот договор би можела да надмине 40 милиони евра годишно, што е значително зголемување во однос на претходните услови. Договорот би ги опфатил и најпрестижните натпреварувања, вклучително и Лигата на шампионите, која има глобална публика од околу 1,2 милијарди гледачи по сезона.

Иако ваквиот потег би ѝ донел на Nike значителна видливост на европскиот фудбалски пазар, аналитичарите предупредуваат дека тоа нема да ги реши клучните предизвици со кои се соочува компанијата. Во последните години, американскиот бренд губи дел од пазарниот удел поради недостиг на иновации и засилена конкуренција од помали и поагилни компании.

Раководството на Nike веќе најави враќање кон основните спортски категории, како фудбалот и трчањето, во обид да ја зајакне позицијата на брендот. Сепак, компанијата се соочува со проблеми како вишок залихи и пад на продажбата, особено на кинескиот пазар.

Експертите оценуваат дека ваквиот договор може да придонесе за зајакнување на имиџот на Nike на среден рок, особено во Европа, но нагласуваат дека долгорочниот успех ќе зависи пред сè од способноста на компанијата да понуди иновативни и атрактивни производи кои ќе ги привлечат потрошувачите.