Хакери украле милиони во биткоини од Bitcoin Depot, корисничките податоци останале безбедни

Операторот на Bitcoin ATM мрежа Bitcoin Depot Inc. пријави во поднесок до американската Комисија за хартии од вредност дека во сајбер напад на 23 март биле украдени околу 50,9 биткоини, во вредност од приближно 3,665 милиони долари.

Според компанијата, напаѓачите успеале да пристапат до нејзините ИТ системи и да добијат пристапни податоци за сметки поврзани со дигитални трансакции, што им овозможило неовластен пренос на криптовалутата. По откривањето на инцидентот, Bitcoin Depot активирал внатрешни протоколи за итна реакција и ангажирал надворешни експерти за сајбер безбедност со цел да се утврди начинот на пробивање и да се заштитат останатите средства.

Компанијата исто така ги известила надлежните органи, но засега не се открива кои институции се вклучени во истрагата. И покрај упадот во системите за порамнување и кражбата на средства, од Bitcoin Depot наведуваат дека корисничките платформи и личните податоци на клиентите не биле компромитирани.

Инцидентот е оценет како значаен за работењето на компанијата, со потенцијални последици врз угледот, како и дополнителни правни, регулаторни и трошоци за справување со нападот. Прелиминарната проценка на загубата се совпаѓа со вредноста на украдените биткоини во моментот на нападот.

Во известувањето не се наведува дали компанијата има осигурително покритие за ваков тип на кражби, ниту како загубата би можела да влијае врз ликвидноста на нејзината мрежа на Bitcoin банкомати.

Ова не е прв безбедносен инцидент за Bitcoin Depot, која и во 2023 година беше цел на напад при кој беа компромитирани податоците на десетици илјади корисници. Во меѓувреме, компанијата се соочува и со зголемен регулаторен притисок, при што неодамна воведе построги правила за идентификација на клиентите при секоја трансакција.

По објавата на инцидентот во поднесокот до SEC, акциите на компанијата бележат зголемена волатилност, откако претходно во текот на денот пораснаа, но потоа дел од добивките беа изгубени во продолженото тргување. Во последниот месец, вредноста на акциите на компанијата значително опадна.