Нова теорија за Сатоши Накамото: дали зад биткоинот стои Адам Бек

Идентитетот на Satoshi Nakamoto, мистериозниот креатор на биткоинот, и понатаму останува една од најголемите нерешени енигми во светот на технологијата. Најновото истражување објавено од The New York Times повторно го отвора ова прашање, посочувајќи дека зад псевдонимот би можел да стои британскиот криптограф Адам Бек. Сепак, тој јавно ги отфрли ваквите тврдења.

Обидите да се открие вистинскиот идентитет на креаторот на биткоинот траат со години, но без конкретен резултат. Новинарот John Carreyrou, познат по своите истражувања во технолошкиот сектор, во овој случај се обидел да ја расветли мистеријата преку анализа на стари комуникации од криптографски форуми.

Сомнежите околу Бек не се случајни. Тој е креатор на системот Hashcash, кој служи како основа за концептот „proof-of-work“ што се користи во Bitcoin. Денес е коосновач и извршен директор на Blockstream, компанија која развива инфраструктура за блокчејн плаќања. И самиот признава дека неговиот профил одговара на описот на потенцијалниот креатор, но инсистира дека не стои зад псевдонимот.

Во обид да ја поткрепи својата теза, истражувањето користи современи алатки за анализа. Собрани се илјадници пораки од криптографски мејлинг листи од периодот кога Сатоши бил активен, а потоа се анализирани со помош на вештачка интелигенција за да се пронајдат сличности во стилот на пишување. Резултатите покажале одредени поклопувања меѓу текстовите на Сатоши и Бек, но тие не се доволни за конечен заклучок.

И покрај напредниот пристап, истрагата не нуди цврсти докази што би ја затвориле оваа долготрајна мистерија. Случајот со Сатоши Накамото останува отворен, а прашањето кој стои зад создавањето на биткоинот продолжува да ја интригира јавноста и технолошката заедница.