Римац и BMW го претставија новиот i7 – електричната иднина добива нов стандард

Европската автомобилска индустрија добива нов симбол на технолошка трансформација – Rimac Technology и BMW Group официјално го претставија резултатот од своето партнерство: новата генерација на BMW i7.

Станува збор за повеќе од обичен модел. Овој автомобил е првиот сериски BMW кој користи заеднички развиен високонапонски батериски систем – технологија што ги спојува најновите цилиндрични ќелии од шестата генерација на BMW со иновативната, скалабилна архитектура на Rimac. Резултатот е значително подобрување во автономијата, ефикасноста и брзината на полнење – три клучни параметри што ја дефинираат иднината на електричните возила.

Светската премиера е закажана за 22 април на Auto China 2026 во Пекинг, каде што BMW ќе покаже како изгледа следната фаза од електрификацијата во премиум сегментот.

Она што ја прави оваа приказна уште поважна за регионот е фактот што срцето на технологијата се создава во Хрватска. Во напредниот кампус на Rimac, во близина на Загреб, веќе функционира комплексна производствена инфраструктура изградена специјално за вакви проекти – со капацитет да одговори на барањата на најголемите светски автомобилски брендови. Токму таму се развиваат и произведуваат батериските системи што ќе го напојуваат новиот i7.

Зад целиот проект стои интензивна инженерска работа – тим од стотици експерти кои во изминатите години успеаја не само да развијат нова технологија, туку и да ја доведат до сериско производство во релативно краток рок. Тоа е редок пример каде иновацијата не останува во лабораторија, туку веднаш се претвора во реален производ на пазарот.

Основачот Mate Rimac нагласува дека ова партнерство покажува како брзината на развој и инженерската прецизност можат да одат рака под рака. Од BMW, пак, ја потенцираат вредноста на соработката, истакнувајќи дека Rimac не е само добавувач, туку вистински технолошки партнер.

Во време кога автомобилската индустрија поминува низ најголемата трансформација во својата историја, ваквите проекти покажуваат како ќе изгледа иднината – поврзана, електрична и создадена преку партнерства што ги бришат границите меѓу традиционалните производители и новата генерација технолошки компании.