Златото без јасен правец по заканите на Трамп и неизвесноста околу Иран

Цената на златото се движи без јасен правец по дводневниот пад, додека инвеститорите внимателно ги следат новите закани од американскиот претседател Доналд Трамп кон Иран и потенцијалните последици од продолжената војна врз глобалната економија. Благородниот метал се тргува околу 4.650 долари за унца, откако во претходните две сесии изгуби повеќе од два проценти, сигнализирајќи зголемена неизвесност на пазарите.

Трамп постави рок за постигнување договор со Техеран, по што, како што најави, би можеле да следуваат напади врз клучна инфраструктура, вклучително и енергетски постројки и мостови. Овие пораки дополнително ја зголемија напнатоста во веќе пролонгираниот конфликт, кој трае повеќе од еден месец и веќе има видливи ефекти врз глобалното снабдување со енергенси и инфлаторните очекувања.

Во такви услови, финансиските пазари се соочуваат со дилема околу идните потези на централните банки. Се засилуваат проценките дека намалување на каматните стапки би можело да биде одложено, па дури и дека некои монетарни власти би можеле да размислат за нивно зголемување. Пазарот на обврзници во САД веќе сигнализира вакви очекувања, со претпоставки дека Федералните резерви ќе задржат стабилна политика во текот на годината. Повисоките камати, пак, традиционално вршат притисок врз златото, бидејќи станува збор за средство кое не носи принос.

Аналитичарите посочуваат дека комбинацијата од растечки инфлаторни очекувања, посилен долар и построга монетарна политика ја ограничуваат способноста на златото да ја задржи својата улога на сигурно засолниште. И покрај тоа што геополитичката неизвесност обично го поддржува интересот за благородниот метал, дел од инвеститорите се принудени да ги намалуваат позициите за да покријат загуби на други пазари.

Од почетокот на конфликтот на Блискиот Исток кон крајот на февруари, златото бележи пад од околу 12 проценти, движејќи се во спротивна насока од нафтата, која продолжува да расте. Сепак, дел од негативниот притисок се ублажува од економските сигнали дека растот забавува, што вообичаено оди во прилог на побарувачката за сигурни актива.

Дополнителен фактор е состојбата во американската економија, каде услужниот сектор бележи побавно проширување, придружено со пад на вработеноста и раст на трошоците за влезни ресурси. Овие трендови укажуваат на зголемен притисок врз економската активност, што може да го врати интересот за златото како заштита од ризик.

Во меѓувреме, се појавуваат и први знаци дека дел од инвеститорите повторно влегуваат на пазарот. Фондовите поддржани со злато минатата недела забележаа прилив на капитал за првпат од почетокот на војната, што укажува на постепено враќање на довербата кај таканаречените „купувачи на пад“.

Паралелно, геополитичките тензии остануваат високи. Прашањето за отворање на Ормутскиот теснец е поставено како клучен услов во евентуален договор, додека Иран продолжува да ги одбива американските предлози и предупредува на можни контрамерки. Овој теснец, кој е од витално значење за глобалната трговија со енергенси, останува ограничен за сообраќај, дополнително зголемувајќи ја неизвесноста на пазарите.

Во ваков амбиент, златото останува под притисок, но и натаму е во фокусот на инвеститорите како потенцијална заштита од економски и геополитички шокови, додека развојот на конфликтот ќе продолжи да ја диктира насоката на неговата цена.