Емиграцијата ја кочи економијата: Бизнисите во Албанија не можат да најдат работници

Албанија се соочува со сериозна криза на работната сила, бидејќи голем дел од населението, околу 40 отсто, веќе ја напуштило земјата во потрага по подобри можности во странство. Оваа емиграција, која трае со години, сега се покажува како сериозна закана за економскиот раст и стабилноста на многу сектори.

Годишниот извештај на Централната банка на Албанија за 2025 година укажува на долгорочните последици од масовното заминување на младите и образовани луѓе, кои се двигатели на економијата. Експертите предупредуваат дека иако зголемувањето на платите во земјата е обид за задржување на работната сила, тоа не е доволно за да се спречи заминувањето, бидејќи проблемите се подлабоки и вклучуваат недостаток на пристап до квалитетно вработување, домување и достоинствен живот.

Ерис Дамо, експерт за социјални прашања, нагласува дека емиграцијата не е нов феномен, но загриженоста се однесува на трајниот ефект што го има на земјата. Според него, образованите и квалификуваните млади луѓе, кои се клучни за иновации и економски развој, продолжуваат да ја напуштаат Албанија поради ограничените можности.

Според оценката на Централната банка, пазарот на трудот е сериозно ограничен, а компаниите се соочуваат со структурни проблеми кои ги спречуваат да најдат и задржат соодветни работници. И покрај националните планови, субвенциите и иницијативите за младите, зголемувањето на платите не е доволно да ја промени ситуацијата, бидејќи нивото на заработка во Албанија сè уште не е конкурентно со оној во Европската унија.

Во такви услови, бизнисите продолжуваат да бараат начини да ги привлечат и задржат работниците, но аналитичарите предупредуваат дека само финансиските стимули нема да ја решат суштинската криза. Централната банка сепак прогнозира одредено подобрување на вработеноста и намалување на невработеноста, како и инфлација во рамките на таргетираните 3 отсто, но успехот на овие мерки ќе зависи од способноста на државата да создаде услови за достоинствен живот и одржливи можности за младите.