Масивниот Hyperion AI дата-центар на Meta ќе троши електрична енергија како цела држава

Масивните дата-центри денес бараат електрична енергија на ниво на цели американски држави. Новиот Hyperion AI дата-центар на Meta во Луизијана, кој се очекува наскоро да биде завршен, ќе троши исто количество електрична енергија како целата држава Јужна Дакота. За да ги задоволи овие потреби, Meta објави дека ќе финансира изградба на седум нови гасни електрани, покрај трите кои претходно ги најави. Заедно, десетте електрани ќе обезбедат околу 7,5 гигавати, што е малку повеќе од капацитетот на Јужна Дакота.

Иако технологиските компании, вклучително и Meta, редовно истакнуваат својот придонес кон заштита на животната средина и редовно објавуваат извештаи за одржливост, одлуката за масивно користење природен гас предизвикува прашања за усогласеноста со тие заложби. Природниот гас често се прикажува како „преоден извор на енергија“, со цел да се изгради инфраструктура додека обновливите извори, батериите и нуклеарната енергија станат доволно стабилни. Но, со падот на цените на обновливите извори и батериите и истовремениот раст на цените на гасните турбини, мотивите за таква одлука стануваат понејасни.

Проектот во Луизијана ќе придонесе за емисија на околу 12,4 милиони метрички тони CO2 годишно, што е за половина повеќе од целокупниот јаглероден отпечаток на Meta во 2024 година. Оваа проценка не го вклучува метанот кој истекува низ синџирот на снабдување со природен гас, а кој има 84 пати поголемо затоплувачко влијание отколку CO2. Дури и мала стапка на истекување од 0,2% може да го направи влијанието на природниот гас поголемо од оној на јаглен, додека американските податоци покажуваат просечни стапки на истекување околу 3%.

Извештајот за одржливост на компанијата не содржи информации за метанските емисии и не го спомнува природниот гас како ресурс. Сепак, токму овој извор на енергија ќе стане еден од најголемите придонесувачи кон јаглеродниот отпечаток на компанијата во следните години. Meta можеби ќе се обиде да ги неутрализира емисиите преку кредити за отстранување јаглерод, но тоа ќе бара значително поголема количина кредити и транспарентно прикажување на вистинските количини метан кои ќе истечат за време на работењето на новите електрани.