Кина го користи својот течен гас за да ги обликува глобалните пазари

Во март, залихите на течен гас во Кина паднаа на најниско ниво од 2018 година, покажуваат податоците на аналитичката компанија Kpler. Намалувањето на резервите се должи на одлучната политика на земјата да ја искористи досегашната залиха и да ја прилагоди потрошувачката, пренасочувајќи дел од товарите на глобалниот пазар во услови на високи цени.

Кина, како најголем купувач на течен гас во светот, оваа година пренасочила осум од десетте нарачани танкери за март, што претставува рекордна количина на месечна основа според податоците на Kpler. Од почетокот на 2026 година, земјата продала вкупно 1,31 милиони тони течен гас, распределувајќи ги танкерите кон Јужна Кореја, Тајланд, Јапонија, Индија и Филипини. Таквата стратегија следи по зголемувањето на цените на течниот гас во Азија за 85 проценти откако започна војната во Иран, а земјите во регионот се посилно зависни од испораките преку Ормускиот теснец отколку од Европа.

Цените на гасот на холандската берза TTF исто така пораснаа за повеќе од 50 проценти поради зголемената побарувачка во азискиот регион, достигнувајќи на 19-ти март врв од 61 евро за мегават-час. Сепак, во последните денови се забележува мало затишје на пазарот и цената во утринските сесии падна под 49 евра за мегават-час.

Намалената потрошувачка во Кина се поврзува со забавување на економската активност, додека локалното производство и испораките од Русија се зголемуваат. Во текот на целата 2025 година, Кина препродала 0,82 милиони тони течен гас, додека во 2023 година таа бројка изнесуваше 0,93 милиони тони, што укажува на континуирано користење на стратешките залихи за регулирање на домашната побарувачка и приспособување на глобалните цени.