Европските берзи растат по најавите на Трамп за крај на конфликтот со Иран

Европските берзи бележат раст трет ден по ред, поттикнати од изјавите на Доналд Трамп дека очекува конфликтот со Иран да заврши во рок од две до три недели, што внесе оптимизам кај инвеститорите.

Паневропскиот индекс Stoxx Europe 600 порасна за 2,4 проценти во утринското тргување во Лондон, при што најголеми добивки остварија секторите туризам и индустрија. Наспроти нив, енергетските компании беа под притисок, откако цената на нафтата Брент падна под 100 долари за барел, првпат по една недела.

На ниво на поединечни компании, значителен раст забележа фармацевтскиот гигант Ново Нордиск, чии акции се зголемија по препораката на британскиот регулатор за лекови неговиот препарат за слабеење да се користи и за превенција од срцеви и мозочни удари.

Позитивното движење на пазарите доаѓа по сигналите од Вашингтон дека САД би можеле наскоро да се повлечат од конфликтот, оставајќи им на другите држави да ги решаваат прашањата поврзани со Ормутскиот теснец. Сепак, неизвесноста останува, особено поради засиленото американско воено присуство во регионот, што остава простор за натамошна ескалација.

Од почетокот на тензиите на Блискиот Исток на крајот на февруари, индексот Stoxx Europe 600 изгуби околу осум проценти, што претставува најголем месечен пад од 2022 година.

Аналитичарите предупредуваат дека е прерано за враќање на целосен оптимизам. И покрај поблагата реторика од двете страни, конкретен договор сè уште нема, а клучниот енергетски коридор останува затворен. Поради тоа, дел од инвеститорите и понатаму заземаат внимателна позиција, очекувајќи појасни сигнали за стабилизација на ситуацијата.