Прв танкер по недели криза успешно помина низ Ормускиот теснец

Супертанкер со околу два милиона барели ирачка нафта успешно го помина стратешкиот Ормутскиот теснец, што претставува прв забележан транспорт на ваков товар откако конфликтот во Иран сериозно го наруши сообраќајот во регионот. Станува збор за бродот Omega Trader, управуван од јапонската компанија Mitsui OSK Lines, кој според податоците за следење веќе пристигнал во Мумбаи.

Пловидбата низ теснецот, кој е клучен за глобалната енергетска трговија и низ кој минува значителен дел од светската нафта и течен природен гас, беше речиси целосно запрена поради воените случувања што траат веќе четврта недела. Намалениот број на танкери што успеваат да поминат придонесе за раст на цените на енергенсите и создаде сериозни нарушувања на пазарот.

Иако движењето на бродови останува ограничено, поединечните премини како овој се сметаат за значајни во ублажување на кризата со снабдување, која според меѓународните енергетски анализи се оценува како една од најголемите во историјата на нафтениот пазар. Дел од танкерите што успеваат да го напуштат Персискиот Залив се упатуваат кон Индија, која активно комуницира со иранските власти со цел да обезбеди сигурен транспорт на енергенси.

Во последните денови се забележани и други бродови што го напуштаат регионот, меѓу кои танкер што превезува нафта од Обединетите Арапски Емирати и друг што е на пат кон индиското пристаниште Вадинар. Сепак, поради практиката дел од бродовите да ги исклучуваат своите системи за следење, не се исклучува можноста дека има и други танкери кои веќе го напуштиле регионот без да бидат евидентирани.