Вештачката интелигенција во прв план: инвеститорите се потпираат на ChatGPT и Claude во време на војна

Во услови на ескалација на конфликтот поврзан со Иран вештачката интелигенција сè поинтензивно станува клучна алатка за инвеститорите кои се обидуваат да ги предвидат движењата на глобалните пазари. Наместо традиционалниот, долг процес на анализа, сè повеќе трговци и фонд-менаџери се потпираат на напредни модели за да донесат побрзи и поинформирани одлуки.

Максенс Висо, основач на инвестициската компанија Arkevium со седиште во Дубаи, е меѓу оние кои ја ставија вештачката интелигенција во центарот на својата стратегија. Во првите денови од конфликтот, тој користел алатки како Claude за да тестира различни сценарија, да ги споредува со историски преседани и да ги анализира потенцијалните ефекти врз различни класи на средства. Според него, времето потребно за истражување било намалено за околу 80 проценти, што овозможило побрза реакција во период на висока пазарна нестабилност.

Слични искуства споделуваат и други пазарни учесници. Големите јазични модели како ChatGPT, Gemini и кинескиот DeepSeek значително го забрзуваат процесот на прибирање и обработка на информации. Таму каде што претходно биле потребни часови или денови за анализа, сега доволни се неколку секунди за да се добие синтеза на најважните податоци.

Фонд-менаџери посочуваат дека оваа технологија не само што заштедува време, туку овозможува и подлабока анализа на историските трендови. Со нејзина помош, инвеститорите можат речиси моментално да ги разгледаат ефектите од претходни воени конфликти врз цените на нафтата и однесувањето на различни пазари, комбинирајќи ги тие податоци со индикатори како инфлација и економски раст.

Ваквиот пристап добива особено значење во контекст на растечката нестабилност на енергетските пазари. Цената на нафтата значително порасна поради стравувањата од нарушување на снабдувањето, особено поради ризиците поврзани со клучни транспортни точки како Ормускиот теснец. Ова дополнително ја зголемува потребата од брза и прецизна анализа, каде што вештачката интелигенција се покажува како важен сојузник.

Сепак, и покрај придобивките, експертите предупредуваат дека технологијата не е без недостатоци. Погрешно формулирани прашања или недоволно проверени резултати може да доведат до неточни заклучоци, што во услови на нестабилни пазари може да има сериозни последици. Затоа, човечката проценка и искуство остануваат незаменливи во процесот на донесување одлуки.

Дополнително, се отвора и прашањето за иднината на одредени работни позиции во финансискиот сектор. Дел од инвеститорите сметаат дека со зголемувањето на ефикасноста на вештачката интелигенција, улогата на помладите аналитичари може значително да се намали, бидејќи голем дел од нивните задачи веќе може да ги извршуваат автоматизирани системи.

Иако за сега вештачката интелигенција претежно се користи како дополнителна алатка, нејзиното влијание врз финансиските пазари брзо расте. Дел од аналитичарите оценуваат дека во следните неколку години таа би можела уште повеќе да се приближи до човечкото одлучување, но засега останува јасно дека најдобри резултати се постигнуваат кога технологијата се комбинира со искуство и критичко размислување.