Apple и Nike ја прошируваат соработката со специјално издание на слушалки

Компаниите Apple и Nike ја продлабочуваат својата долгогодишна соработка преку нов заеднички производ, овојпат во рамките на брендот Beats. Станува збор за лимитирано издание на безжичните слушалки Powerbeats Pro 2, кои за првпат носат ко-брендирање со надворешен партнер, односно препознатливото лого на Nike.

Новата верзија, наречена „Powerbeats Pro 2 – Nike Special Edition“, ќе биде достапна од 20 март преку интернет и во одредени Apple продавници, по иста цена како стандардниот модел. Дизајнот е освежен со мат црна завршница на куќиштето, збогатена со карактеристични детали инспирирани од Nike, додека познатата порака „Just Do It“ е втисната од внатрешната страна на капакот.

Ова издание не носи само визуелни измени, туку се базира на технолошките унапредувања што ги донесе втората генерација на Powerbeats Pro. Слушалките се меѓу првите од Apple кои нудат интегрирано следење на срцевиот ритам во реално време, функција што подоцна се очекува да се прошири и на други аудио уреди од компанијата. Покрај тоа, корисниците добиваат активно поништување на бучава, подобрен дизајн на закачалката за уво и поддршка за безжично полнење. Батеријата, заедно со куќиштето, овозможува до 45 часа користење.

За промоцијата на овој модел повторно е ангажиран познатиот кошаркар Леброн Џејмс, кој и претходно соработуваше со Beats. Овојпат, кампањата има поопуштен и хумористичен пристап, прикажувајќи го спортистот во неочекуван амбиент – на голф терен наместо на кошаркарски паркет.

Соработката меѓу Apple и Nike има длабоки корени и датира уште од времето на iPod, кога беше претставен сензор за во патика што им овозможуваше на корисниците да ги следат своите тркачки активности. Новиот заеднички производ претставува логично продолжение на таа врска, но и обид да се понуди поатрактивен производ за активни корисници кои бараат комбинација од технологија, спорт и стил.