Илон Маск ветува лансирање на новиот Roadster кон крајот на април

Илон Маск најави дека Tesla конечно би можела да го претстави долгоочекуваниот нов Roadster веќе следниот месец, најверојатно кон крајот на април. Ова е најновата временска рамка во серијата одложувања што го следат проектот уште од неговото прво претставување пред повеќе од осум години.

Маск изјави дека компанијата „се надева“ на ваков рок, што повторно остава простор за неизвесност, имајќи предвид дека претходните најави не се реализираа. Во текот на минатата година, тој неколкупати најавуваше дека демонстрацијата ќе се случи порано, па дури и се шегуваше со можен датум на 1 април, алудирајќи на можноста за одложување.

Втората генерација на Roadster првпат беше најавена во 2017 година со амбициозен план за испорака до 2020 година. Наместо тоа, моделот стана еден од најдолговечните и најконтроверзни проекти на компанијата. И покрај тоа, интересот остана висок, а резервациите се отворени со години. Потенцијалните купувачи требаше да уплатат значителни депозити, при што за ограничената серија сумите достигнуваа и до 250.000 долари.

Долгото чекање предизвика незадоволство кај дел од клиентите, вклучително и познати имиња од технолошката индустрија. Сем Алтман и Маркес Браунли јавно соопштија дека се откажале од своите резервации, иако Маск посочи дека барем дел од средствата биле вратени во краток рок.

И покрај доцнењата, од Tesla најавуваат импресивни перформанси за новиот модел. Според достапните информации, Roadster треба да забрзува од 0 до 100 километри на час за помалку од две секунди, да има автономија од околу 1.000 километри и да нуди простор за четири патници. Дополнително, Маск навести дека возилото ќе биде развиено во соработка со SpaceX и би можело да вклучува напредни технологии, па дури и ракетни потисници за подобри перформанси.

Во позадина, компанијата продолжува со подготовки за лансирањето, вклучувајќи нови вработувања и поднесување заштитни знаци поврзани со моделот. Roadster се смета за важен дел од идната понуда на Tesla, особено во период кога компанијата постепено ги повлекува луксузните модели како Model S и Model X од центарот на својата стратегија.

Претставувањето на новиот Roadster доаѓа во клучен момент за Tesla, која паралелно работи на развој на нови проекти, меѓу кои електричниот камион Semi, автономното возило Cybercab и хуманоидниот робот Optimus. Маск веќе најави дека 2026 година ќе биде пресвртна за компанијата.

Иако точниот датум на премиерата сè уште не е потврден, најавите повторно ја разгореа возбудата меѓу љубителите на брендот, кои со години го чекаат враќањето на легендарното име Roadster во ново, технолошки напредно издание.