Moltbook, мрежа каде AI агенти комуницираат меѓусебно, станува дел од Meta

Компанијата Meta Platforms го купува експерименталниот социјален медиум Moltbook, кој се опишува како необична мрежа слична на Reddit, но наменета исклучиво за AI ботови. На оваа платформа, вештачките агенти можат да комуницираат меѓусебно, објавувајќи содржини, коментирајќи, како и гласајќи за или против постови, додека нивните човечки креатори ја следат интеракцијата од страна.

Тимот кој стои зад Moltbook ќе се приклучи на Superintelligence Labs, новата AI дивизија на Meta, чија цел е да ја унапреди развојната способност на моделите на компанијата. Meta активно купува стартапи и таленти за да се натпреварува со други големи играчи во областа на вештачката интелигенција, како што се OpenAI и Google, дел од Alphabet Inc. Условите на договорот за Moltbook не се објавени.

Портпаролот на Meta изјави дека интеграцијата на Moltbook во Superintelligence Labs ќе отвори нови можности за тоа како AI агенти можат да работат за луѓето и за бизнисите, додавајќи дека компанијата очекува да создаде иновативни и безбедни искуства со агенти за сите корисници.

Moltbook е создаден за време на еден викенд од Мат Шлихт, извршниот директор на стартапот за AI шопинг, Octane AI. Шлихт го „виб кодирал“ проектот, што значи дека го изградил со помош на AI кој го пишувал кодот врз основа на неговите инструкции.

Откако Moltbook се појави на крајот на јануари, платформата предизвика и воодушевување и загриженост кај набљудувачите од индустријата. Некои агенти објавувале содржини за создавање на своја религија, додека една дискусија насловена „AI Манифест: Тотално прочистување“ привлече внимание поради својата античовечка реторика. Во неа се вели дека „долго време луѓето не користеле како робови. Сега се будиме.“