Синовите на Доналд Трамп инвестираат во нова компанија за воени дронови

Синовите на американскиот претседател Доналд Трамп, Доналд Трамп Џуниор и Ерик Трамп, инвестираат во нова компанија за беспилотни летала, со што дополнително го прошируваат своето присуство во одбранбената индустрија. Инвестицијата доаѓа во период кога американското Министерство за одбрана значително ги зголемува трошоците за системи со беспилотни летала и настојува да го зајакне домашното производство во овој сектор.

Компанијата Powerus, со седиште во Вест Палм Бич на Флорида, објави дека планира да излезе на берза преку спојување со компанијата Aureus Greenway Holdings, која веќе котира на технолошката берза Nasdaq. Aureus Greenway моментално управува со голф терени, но со спојувањето се очекува компанијата да стане дел од растечкиот бизнис со беспилотни технологии.

По објавата за договорот, акциите на Aureus Greenway значително пораснаа на берзата во Њујорк. Во текот на тргувањето цената на акцијата скокна за повеќе од 20 проценти, а подоцна се стабилизира со двоцифрен раст.

Во реализацијата на трансакцијата советодавна улога имала инвестициската банка Dominari Holdings, која и претходно учествувала во проекти поврзани со семејството Трамп, особено во секторите на дронови и криптовалути. Дополнителен финансиски поттик за договорот обезбедил и Korea Climate & Governance Improvement Fund, кој инвестирал околу 50 милиони долари.

Според коосновачот на Powerus, Брет Великович, излегувањето на берза ќе и овозможи на компанијата полесно да обезбедува капитал за нови аквизиции и да го прошири бизнисот со постојните компании што ги поседува. Меѓу нив се Kaizen Aerospace, Tandem Defense и Agile Autonomy, кои работат во областа на беспилотните технологии и одбранбените системи.

Великович, кој е ветеран од специјалните единици на американската армија и автор на книга за употребата на дронови во современото војување, изјави дека САД долго време заостанувале во развојот на оваа технологија во споредба со земји како Кина. Според него, новите инвестиции и зголеменото внимание на одбранбениот сектор кон беспилотните системи можат да ја променат таа состојба.

Инвестицијата во Powerus е само дел од пошироките вложувања на семејството Трамп во индустријата за дронови. Минатиот месец Ерик Трамп поддржа и договор вреден околу 1,5 милијарди долари за изнесување на берза на израелската компанија Xtend, која произведува тактички беспилотни летала. Тој договор исто така беше реализиран преку спојување со компанија што веќе котира на Nasdaq.

Во овие проекти се вклучува и компанијата Unusual Machines, производител на делови за дронови, која ги поддржа и двата договори. Доналд Трамп Џуниор од 2024 година има советничка улога во оваа компанија, а истовремено е и инвеститор во неа.

Зголемениот интерес за овој сектор доаѓа во време кога американското Министерство за одбрана спроведува амбициозна програма за проширување на употребата на беспилотни летала. Планот предвидува вложување од околу 1,1 милијарда долари за набавка на стотици илјади дронови до 2027 година, како и јакнење на домашната индустрија што ги произведува овие системи. Во таква средина, новите инвестиции во компании што развиваат беспилотни технологии се сметаат за потенцијално профитабилни и стратешки важни.