Војната со Иран го загрозува извозот на автомобили од Азија кон Блискиот Исток

Војната меѓу САД, Израел и Иран, која влезе во седмиот ден, почнува сериозно да влијае врз глобалната автомобилска индустрија, особено врз испораките на возила од Азија кон Блискиот Исток. Регионoт претставува еден од најважните извозни пазари за азиските производители на автомобили, а транспортот низ Ормутскиот теснец, клучната поморска рута за трговијата, речиси целосно е запрен поради страв од напади.

Блискиот Исток е втор по големина странски пазар за автомобили произведени во Кина и има сè поголемо значење за кинеските производители кои се обидуваат да ја компензираат слабата домашна побарувачка. Во 2025 година кинеските компании извезле 8,32 милиони возила ширум светот, од кои околу 1,39 милиони биле испратени во земјите од Персискиот Залив, како Саудиска Арабија и Обединетите Арапски Емирати. Меѓу најголемите извозници се компании како BYD, SAIC Motor, Changan Automobile и Geely.

Значајна изложеност кон пазарот на Блискиот Исток има и Индија. Во 2025 година таа извезла автомобили во вредност од околу 8,8 милијарди долари, при што една четвртина од тие возила завршиле во земјите од Заливот. Особено зависни од овој пазар се Hyundai Motor Company и Toyota Motor Corporation, кои голем дел од своите извозни количини од Индија ги насочуваат токму кон Блискиот Исток.

Јужна Кореја исто така има силно присуство во регионот. Вкупниот извоз на автомобили од земјата во 2025 година достигна рекордни 72 милијарди долари, од кои околу 5,3 милијарди биле наменети за пазарите на Блискиот Исток. За компаниите како Kia Corporation и Hyundai Motor Company, овој регион претставува значаен дел од нивната глобална продажба.

И јапонските производители се соочуваат со потенцијални последици. Само Toyota Motor Corporation во 2025 година извезла повеќе од 320.000 возила од Јапонија кон Блискиот Исток, што претставува повеќе од 15 проценти од нејзиниот вкупен извоз. Поради логистичките проблеми поврзани со конфликтот, компанијата веќе планира да произведе околу 40.000 помалку возила наменети за овој пазар.

Прекинот на транспортните рути создава сериозна неизвесност за автомобилските компании во Азија, бидејќи Блискиот Исток претставува клучен пазар со милијарди долари вредност. Доколку конфликтот продолжи и пловидбата низ Ормутскиот теснец не се нормализира, испораките на возила кон регионот би можеле значително да се намалат, што ќе има пошироки последици за глобалната автомобилска индустрија.