Светските бродски гиганти го избегнуваат Персискиот Залив по ескалацијата меѓу САД и Иран

Глобалната бродска индустрија се соочува со сериозни нарушувања откако најголемите светски компании почнаа да го избегнуваат Персискиот Залив поради ескалацијата на конфликтот меѓу САД, Израел и Иран. Во услови на растечка несигурност, дел од клучните поморски и логистички оператори ги суспендираа активностите во регионот.

MSC Mediterranean Shipping Company, најголемата контејнерска линија во светот, ги запре резервациите на товар за Блискиот Исток. Данскиот гигант A.P. Moller-Maersk и германскиот превозник Hapag-Lloyd целосно го суспендираа преминувањето низ Ормутскиот теснец. Во меѓувреме, DP World ги запре операциите во пристаништето Џебел Али во Дубаи, што претставува дополнителен удар за регионалната трговија.

Џебел Али, најпрометното контејнерско пристаниште во светот надвор од Азија, беше погодено од пожар на едно од сидриштата, предизвикан од паднати остатоци при пресретнување на воздушен напад. Локалните служби за цивилна заштита интервенираа за да го изгаснат пожарот. Според извештаи, во неделата биле нападнати и три бродови во близина на влезот во Персискиот Залив.

Нарушувањата во логистиката претставуваат сериозен удар за деловните центри како Дубаи, чија економија во голема мера се потпира на трговијата, транспортот, туризмот и финансиските услуги. Репутацијата на градот како стабилно и безбедно деловно прибежиште во нестабилен регион е доведена во прашање со ширењето на конфликтот во повеќе земји од Блискиот Исток. Двете најголеми авиокомпании во Обединети Арапски Емирати исто така ги суспендираа летовите, а дел од аеродромската инфраструктура претрпе оштетувања од остатоци од напади.

Покрај контејнерскиот сообраќај, забавено е и движењето на бродови што транспортираат нафта и гас низ Ормутскиот теснец, клучна рута за глобалното снабдување со енергенси. Предупредувањата до бродовите да го избегнуваат тесниот воден пат дополнително ја намалуваат активноста во регионот, што може да има далекусежни последици врз светската трговија и цените на енергијата доколку кризата продолжи.