Вештачката интелигенција ќе ги преземе повеќето канцелариски работни места за 18 месеци, предупредуваат од технолошкиот врв

Извршниот директор за вештачка интелигенција во Microsoft, Мустафа Сулејман, им се придружи на сè погласните предупредувања од врвни технолошки лидери дека автоматизацијата на работните места ќе се забрза со невидено темпо како резултат на брзиот напредок на вештачката интелигенција.

Во интервју за Financial Times, Сулејман изјави дека технологијата во релативно краток период би можела да стане способна да ги извршува повеќето професионални задачи што денес се прават на компјутер. Според него, системите ќе достигнат ниво на ефикасност споредливо со човечкото во голем дел од интелектуалните и административните професии. Тој смета дека задачите поврзани со правото, сметководството, управувањето со проекти и маркетингот би можеле значително да се автоматизираат во период од една до година и пол.

Сулејман нагласува дека ова не е далечна иднина, туку процес што веќе е во тек. Во софтверското инженерство, на пример, алатките базирани на вештачка интелигенција веќе активно се користат за создавање програмски код, што суштински го менува начинот на кој работат развивачите. Според него, ваквата промена во односот кон технологијата се случила многу брзо, особено во последните неколку месеци.

Вештачката интелигенција веќе значително го трансформира канцелариското работење. Иако многу компании бележат пораст на продуктивноста, се појавуваат и нови предизвици. Business Insider неодамна пишуваше за појава на таканаречен „замор од вештачка интелигенција“ кај софтверските инженери, кои се соочуваат со зголемен обем на задачи и поголем притисок поради очекувањата за повисока ефикасност.

Меѓу најактивните компании во интеграцијата на ваквите технологии е токму Microsoft, кој развива напредни алатки за работа со вештачка интелигенција и инвестира во истражување преку партнерства со OpenAI и Anthropic.

Сепак, Сулејман не е единствениот што предупредува на можните последици од ваквиот развој. Дел од научната заедница смета дека влијанието врз пазарот на трудот може да биде драматично. Stuart Russell, еден од највлијателните истражувачи во областа на вештачката интелигенција, предупреди дека политичките лидери веќе разгледуваат сценарија во кои масовната автоматизација би можела да доведе до невработеност и до 80 проценти. Во такви услови, според него, ризикот би ги опфатил професиите низ целиот спектар – од медицината до највисоките менаџерски позиции.

Слична загриженост изрази и Dario Amodei, извршен директор и коосновач на Anthropic. Во разговор за Axios тој предупреди дека вештачката интелигенција би можела сериозно да ги загрози дури половина од канцелариските работни места на почетно ниво. Според него, креаторите на технологијата имаат одговорност отворено да зборуваат за промените што доаѓаат, бидејќи многу луѓе сè уште не ја сфаќаат нивната вистинска големина.

Сè повеќе експерти се согласуваат дека вештачката интелигенција нема само да ги подобри постојните работни процеси, туку суштински ќе го преобликува начинот на кој работиме, кои вештини ќе бидат потребни и како ќе изгледа идниот пазар на трудот. Прашањето веќе не е дали ќе дојде до промена, туку колку брзо и колку длабоко ќе ја почувствува секој сектор од економијата.