Турбуленции на Волстрит: технолошките гиганти губат милијарди додека расте неизвесноста околу вештачката интелигенција

На Волстрит во четвртокот дојде до нагло намалување на цените на акциите, особено во технолошкиот сектор, бидејќи инвеститорите сè почесто се прашуваат колку навистина ќе се исплатат огромните вложувања во развојот на вештачката интелигенција. Падот на главните индекси во голема мера беше предизвикан токму од слабеењето на технолошките акции, што во последниот период станува сè почеста појава. Причината е растечката неизвесност околу тоа кои компании ќе успеат да извлечат реална корист од вложувањата во новите технологии, а кои би можеле да заостанат во конкуренцијата што станува сè поостра.

Воедно, дел од инвеститорите сметаат дека вреднувањата на големите технолошки компании се превисоки, особено по повеќегодишниот силен раст на нивните акции. Поради тоа, во последно време не е невообичаено цените на акциите на технолошките гиганти да бележат големи дневни осцилации, со значителни добивки или загуби.

Во четвртокот акциите на Cisco Systems паднаа за повеќе од 12 проценти, откако дел од деловните резултати на компанијата, особено во одредени сегменти, разочараа во однос на очекувањата на пазарот. Под притисок се најдоа и транспортниот сектор, како и компаниите од софтверската индустрија.

Според аналитичарите, пазарот во моментов внимателно проценува кои индустрии би можеле да ја зголемат продуктивноста благодарение на инвестициите во вештачката интелигенција, а кои би можеле да бидат негативно погодени од нејзиниот развој. Оваа година се смета за клучна, бидејќи треба појасно да покаже каков поврат можат да донесат вложувањата во овие технологии.

Претпазливост беше забележлива и на европските берзи. Лондонскиот индекс FTSE се намали за 0,67 проценти и заврши на 10.402 поени, франкфуртскиот DAX благо ослабе за 0,01 процент на 24.852 поени, додека парискиот CAC порасна за 0,33 проценти и достигна 8.340 поени.