Саудиска Арабија вложува 2 милијарди долари во соларни паркови од 2.000 мегавати

Саудиска Арабија најави значајна инвестиција во турскиот енергетски сектор, при што околу 2 милијарди долари ќе бидат насочени кон развој на соларни енергетски проекти во Турција. Информацијата ја соопшти турскиот министер за енергетика Алпарслан Бајрактар преку објава на социјалната мрежа X, истакнувајќи дека станува збор за почеток на поширока соработка меѓу двете земји во областа на обновливите извори на енергија.

Според министерот, инвестицијата претставува прва фаза од заеднички план кој предвидува реализација на повеќе проекти насочени кон зелената транзиција и зголемување на уделот на чистата енергија во турскиот енергетски микс. Во таа насока, веќе е потпишан меѓувладин договор за изградба на две големи соларни електрани во покраините Сивас и Караман.

Двата соларни парка ќе имаат вкупен инсталиран капацитет од 2.000 мегавати, што ќе ги вброи меѓу најголемите проекти од ваков тип во земјата. Бајрактар најави дека по оваа почетна инвестиција ќе следуваат дополнителни проекти поврзани со соларна и ветерна енергија со вкупен капацитет од околу 3.000 мегавати, иако деталите за нив допрва ќе бидат финализирани.

Електричната енергија произведена од овие соларни електрани ќе ја откупува турската држава во период од 25 години, врз основа на долгорочни договори. Цената за струјата од електраната во Караман е утврдена на 1,995 евро центи по киловат-час, додека електраната во Сивас ќе продава по цена од 2,3415 евро центи за киловат-час. Според министерот за енергетика, станува збор за едни од најниските договорени цени за обновлива енергија во Турција досега.

Како што пренесува Bloomberg, изградбата на двата соларни комплекса ќе ја реализира саудиската енергетска компанија ACWA Power, која има искуство со развој на вакви проекти во повеќе земји, меѓу кои Малезија, Индонезија и Узбекистан. Значаен дел од сопственичката структура на компанијата е поврзан со државниот Инвестициски фонд на Саудиска Арабија, кој управува со околу 44 проценти од нејзините средства.

Турските медиуми дополнително наведуваат дека, кога ќе се земат предвид сите фази и планирани проширувања, вкупната вредност на договорите поврзани со оваа соработка може да достигне околу 5 милијарди долари, што ја прави една од најголемите странски инвестиции во турскиот сектор за обновлива енергија во последните години.