Европската унија произведе 6 милиони тони тестенини: Италија доминира на пазарот

Во 2024 година, земјите-членки на Европската Унија произведоа вкупно 6 милиони тони тестенини, со вкупна вредност од 9,1 милијарди евра, покажуваат податоците на Евростат. Во споредба со 2023 година, вредноста на произведените тестенини се зголеми за 3%, додека нивниот обем се намали за 5%, што укажува на поскапување и повисок квалитет на производите. Над две третини од вкупното производство, точно 4,1 милиони тони, доаѓаат од Италија, која и годинава ја потврди својата доминација на пазарот. На второто место се наоѓа Шпанија со 6% од производството, додека Германија учествува со 5%, односно 290 илјади тони.

Во однос на извозот, земјите-членки на ЕУ извезоа 2,9 милиони тони тестенини, додека увезоа 1,7 милиони тони. Италија повторно е водечки извозник, со 2,2 милиони тони, што претставува над три четвртини од целиот извоз. Шпанија е втор најголем извозник со 131 илјада тони, или 5% од вкупниот извоз. Најголемиот дел од извозот, околу 55%, беше насочен кон други земји-членки на ЕУ, додека преостанатите 45% завршија надвор од Унијата, со Велика Британија и САД како најзначајни дестинации, кои сочинуваат 25% и 23% од целиот извоз надвор од ЕУ.

Увозот на тестенини меѓу земјите-членки покажува дека Германија е водечки увозник, со 468.000 тони или 28% од вкупниот увоз, пред Франција со 372.000 тони и 22% од увозот. Овие бројки укажуваат на силна поврзаност помеѓу земјите во рамките на ЕУ, но и на значајниот интерес за тестенини на глобалниот пазар.

Производството и трговијата со тестенини во ЕУ се стабилен сектор кој продолжува да се развива и иновира, при што Италија останува неприкосновен лидер, позната по висок квалитет и традиција во производство на тестенини. Податоците беа објавени по повод Светскиот ден на тестенините, кој се прослави на 25 октомври, потсетувајќи на важноста на овој производ како дел од европската и светската гастрономија.