Светските резерви на хелиум се преполовени, Русија бара начин да ги зголеми испораките

Светските резерви на хелиум се намалени за речиси една третина, предупреди рускиот премиер Михаил Мишустин, додавајќи дека Русија ја испитува можноста за зголемување на сопственото производство на овој критичен гас. Мишустин истакна дека хелиумот се користи не само во полупроводничката индустрија, туку и во металургијата, уредите за магнетна резонанца и системите за вештачка интелигенција, што го прави неговото обезбедување клучно за индустриските и технолошките сектори.

Според податоците на Американскиот геолошки завод, САД остануваат најголем светски производител на хелиум, со 81 милион кубни метри произведени во 2025 година, вклучувајќи хелиум произведен во Канада и рафиниран во Соединетите Американски Држави. На второ место е Катар со 63 милиони кубни метри, но проблемите со оштетени објекти предизвикаа отежнато исполнување на договорните обврски. Русија со 18 милиони кубни метри го зазема третото место, додека Алжир произведува 11 милиони кубни метри.

Извршниот директор на Сибирски финансиски систем, Валентин Богомолов, истакна дека Русија има потенцијал за зголемување на производството со користење на постојните капацитети и со развој на нови гасни полиња во источен Сибир, каде што се регистрирани високи концентрации на хелиум. Премиерот Мишустин нагласи дека главен приоритет останува заштитата на домашните потрошувачи од надворешни ценовни шокови, наведувајќи како пример забрани за извоз на бензин и азотни ѓубрива.

Меѓународните добавувачи, како француската група „Ер Ликвид“, веќе преземаат мерки за прилагодување на снабдувањето, прераспределувајќи хелиум од различни региони за да ги задоволат потребите на клучните индустрии, вклучително и производителите на чипови на Тајван. Претставниците на индустријата предупредуваат дека долгорочните нарушувања на снабдувањето може да доведат до зголемување на трошоците и неопходни промени во синџирите на снабдување, вклучително и барање алтернативни извори на суровини и енергија.