Кинескиот HyperStrong очекува двојно зголемување на испораките на системи за складирање енергија

Кинеската компанија Beijing HyperStrong Technology, еден од водечките снабдувачи на системи за складирање енергија, очекува значително зголемување на испораките во текот на оваа година, поттикнато од силната побарувачка како на домашниот, така и на меѓународните пазари.

Според најавите на извршниот директор и претседател на компанијата, Џианхуи Жанг, вкупните испораки во 2026 година би можеле да достигнат 70 гигават-часови, што претставува повеќе од двојно зголемување во однос на минатогодишните 26 гигават-часови. Најголемиот дел од оваа количина, околу 60 гигават-часови, се очекува да дојде од кинескиот пазар, додека преостанатите 10 гигават-часови ќе бидат резултат на растечката побарувачка во странство.

Кина веќе има најголем пазар за складирање енергија во светот, а неговиот развој значително се забрза во последните години. Владините политики кои поттикнуваат изградба на вакви системи имаат за цел да обезбедат поголема стабилност на електричната мрежа и поефикасна интеграција на обновливите извори на енергија, како што се сончевата и ветерната енергија.

Дополнителен фактор што ќе ја зголеми побарувачката во наредниот период е брзиот развој на инфраструктурата за вештачка интелигенција. Големите дата-центри, кои се неопходни за функционирањето на овие технологии, бараат стабилно и сигурно снабдување со електрична енергија, при што сè почесто се поставуваат услови тие да користат енергија од обновливи извори. Во такви услови, системите за складирање енергија стануваат клучен елемент за балансирање на производството и потрошувачката.

Слични трендови се забележуваат и надвор од Кина. Според компанијата, побарувачката во Северна Америка е во пораст, додека во Европа најголем поттик доаѓа од потребата за модернизација на електричните мрежи. По неколку години на интензивно проширување на меѓународните активности, Beijing HyperStrong Technology веќе бележи значително зголемување на нарачките од овие региони.

Очекувањата на компанијата се дека токму странските пазари ќе имаат важна улога во нејзиниот вкупен раст во текот на годината, што дополнително ја потврдува глобалната важност на технологиите за складирање енергија во период на забрзана енергетска транзиција.